Një aksident me vdekje ka ndodhur këtë të enjte në fshatin Samaticë të bashkisë Dimal.
Një fëmijë 4 vjeç është përplasur nga një automjet që qarkullonte me shpejtësi në rrugën e fshatit. Mësohet se i mituri, G.O, ka qenë në makinë me xhaxhain e tij dhe ky i fundit ka parkuar në anë të rrugës për të blerë diçka në një market. Fëmija, pasi ka parë xhaxhain që ka dalë, ka hapur derën dhe ka kaluar me shpejtësi rrugën, kur dhe është përplasur e marrë zvarrë disa metra nga një automjet tip Audi, me ngjyrë të zezë.
Pas përplasjes, fëmija ka gjetur vdekjen e menjëhershme në vend dhe është transportuar me ambulancë drejt Morgut të Spitalit Rajonal Berat. Drejtuesi i mjetit, 46-vjeçari Ramadan Gjozi është shoqëruar në ambjentet e Drejtorisë Vendore të Policisë Berat, ku po merret në pyetje në lidhje me ngjarjen e rëndë. Efektivë të Policisë Rrugore kanë shkuar në vendngjarje dhe po punojnë për zbardhjen e rrethanave të aksidentit.
/a.r
