“Associated Press” ka publikuar një video të rrallë të 22 viteve më parë, kur ish-kryesocialisti Fatos Nano u lirua nga burgu për të shkuar në varrimin e nënës së tij.
Nano kishte marrë 17 orë leje nga autoritetet e atëhershme.
Në video duket Nano i rrethuar nga shumë njerëz. Ai duket se mbahet prej krahu nga deputeti i sotëm i PS-së, Paulin Sterkaj. Në atë kohë, Sterkaj ishte shefi i repartit special të policisë “Brisku”.
“Dua të falënderoj autoritetet që më dhanë mundësinë t’i jap lamtumirën e fundit, bashkë me njerëzit e mi më të afërt, nënës sime. I falënderoj sepse do të përgëzoja faktin që ata e njohin armëpushimin. Para vdekjes edhe hasmerit ulin armët”, tha Nano gjatë ceremonisë mortore të nënës së tij.
“AP” komenton se në varrimin e nënës së Fatos Nano morrën pjesë mbi 5.000 persona dhe se lideri historik i së majtës shqiptare u prit aso kohe si hero nga qytetarët e Tiranës.
