Deputetja e Partisë Socialiste, Ermonela Felaj ka komentuar videon e publikuar nga gazetari Artan Hoxha ku shihet kryebashkiaku i Bulqizës duke thithur kokainë në një banak lokali. Në një prononcim për mediat, teksa Felaj po komentonte vijimësinë e Vettingut në polici, u pyet edhe për pamjet që janë në faqet e para të të gjitha mediave prej ditësh.
Deputetja u shpreh se çështja është nën hetim, por nuk ngurroi të shtonte se ato pamje vënë në dukje shkeljen e etikës së punës dhe nëse vërtetohet që personi në video është Lefter Alla, duhet të largohet.
“Unë nuk dua të paragjykoj asnjë. Isha e bindur që do të kishte reagim. Më vjen mirë që ka reagim në shoqëri. Sjellje të tilla janë të papranueshme për shoqërinë dhe që s’duhet të kryhen nga asnjë lloj funksionari. Ligji është abstrakt dhe nuk mund të parashtrojë çdo detaj. Nëse dikush thyhen rregullat që lidhen me etikën e punës, nuk meriton ta ushtrojë më fare këtë funksion. Nuk ka lidhje me ambjentin por ka lidhje me të qenit përdorues. Dhe nuk po flas me rastin konkret. Rasti konkret është nën hetim nga Prokuroria. Flas për këdo që do të shfaqej në ato pamje,”- tha Felaj ndër të tjera.
g.kosovari
