Një ditë pasi u futën me forcë në ambientet e Teatrit “Petro Marko”, ku po zhvillohej mbrëmja gala për festat e fundvitit dhe pas premtimeve të dhëna një natë më parë se situata do t’i kthehet normalitetit, qytetarët e Vlorës detyruar sërish që mëngjesin e sotëm të mbushin ujë me bidona.
Disa prej tyre kanë shkuar të mbushin ujë, dhe disa të tjerë ashtu sikurse paralajmëruan një ditë më parë janë mbledhur për të protestuar jashtë ambienteve të Bashkisë së Vlorës. Burime për mediat bëjnë me dije se protestuesit kanë tentuar që të futen me forcë brenda ambienteve të Bashkisë, teksa kordon janë vendosur efektivët e policisë.
Vlora ndodhet në ditën e katërt pa furnizim me ujë të pijshëm. Prej më shumë se 92 orësh, pjesa më e madhe e qytetit është pa ujë, duke detyruar banorët që në orët e para të mëngjesit të drejtohen drejt burimeve. Qytetarët janë grumbulluar pranë burimit nëntokësor afër tunelit të Ujit të Ftohtë, si edhe pranë një depoje të ujësjellësit në këtë zonë, në përpjekje për të siguruar ujë për nevojat bazë.
Indinjata mes qytetarëve është e madhe. Ata fajësojnë Bashkinë e Vlorës për mungesën e një zgjidhjeje konkrete, duke theksuar se prej ditësh janë të detyruar të mbushin ujë kudo që munden. Situata bëhet edhe më e vështirë për shkak të afrimit të festave të Vitit të Ri, ndërsa në zonën e Ujit të Ftohtë janë parë edhe emigrantë vlonjatë që ndodhen në qytet për pushime.
Një ditë më parë, të revoltuar nga mungesa e ujit të pijshëm, disa qytetarë hynë me forcë në ambientet e Teatrit “Petro Marko”, ku po zhvillohej mbrëmja festive e fundvitit. Ata ndërprenë shfaqjen, duke brohoritur thirrje si “Duam ujë” dhe “Poshtë qeveria”.
Atak ërkuan zgjidhje të menjëhershme dhe u shprehën se institucionet duhet të fokusohen te zgjidhja e problemit, e jo te propaganda.
“Ky investim qenka fals. Unë kam të drejtë të protestoj dhe të kërkoj atë që më takon. Zyrtarët duhet të bëjnë punë reale, jo foto dhe propagandë, sepse me propagandë nuk laheshe dhe nuk pihet ujë”, u shpreh një prej vlonjatëve.
