Në mbledhjen me dyer të mbyllura të Byrosë së Kuvendit ka raportuar edhe kryetare LSI-së, Monika Kryemadhi e cila i është përgjigjur pyetjeve të anëtare të këtij organi në lidhje me hedhjen e disa objekteve gjatë seancës plenare të ditës së hënë.
Në këtë video Kryemadhi nuk ka kundërshtuar asgjë nga pamjet që kanë dalë në media, por ka theksuar se ajo është në respektim të ligjit themeltar të shtetit e mbi të gjitha të mbrojtjes së lirive dhe të drejtave të qytetarëve shqiptarë.
“Jam në përputhje të plotë. Betohem me nder se do të kryejë me ndërgjegje detyrën si deputet i popullit në Kuvend, do përfaqësoj denjësisht popullin, do t’i bindem Kushtetutës dhe ligjeve, do të mbroj liritë dhe pavarësinë e Shqipërisë, do të respektoj e do të mbrojë të drejtat dhe liritë e shtetasve, do të punojë me të gjitha fuqitë e mia për përparimin e atdheut, dhe mirëqenien e popullit tim. Përparimi i Atdheut dhe mirëqenia e popullit tim nuk është droga dhe krimi i organizuar”, është shprehur para Byrosë Kryemadhi.
Ndërkohë që Byroja është mbledhur me kërkesë të deputetë të mazhorancës për të kërkuar marrjen e masave me përjashtim nga punimet e Kuvendit të disa deputetëve të opozitës të cilët në seancën e ditës së hënë në Parlament thyen rendin dhe qetësinë si dhe penguan votimin e kryeprokurores së re të përkohshme, Arta Markut.
