Detaje të reja nga atentati dje në zonën e Lungomares në Vlorë ku objektiv ishte Inez Hajrulla, një personazh i njohur për drejtësinë. Deri tani policia ka shoqëruar 20 persona për t’u marrë në pyetje, ndërsa janë sekuestruar edhe kamerat e bizneseve për të identifikuar autorët.
Në makinën tip Land Rover, që nga hetimet rezultoi të ishte me targa të vjedhura ku dhe janë sekuestruar dy automatikë të djegur kanë qenë katër persona.
Fillimisht njëri nga katër personat që kanë qenë në makinë ka qëlluar në drejtim të tavolinës ku ishte ulur Inez Hajrulla së bashku me personat e tjerë. Por duke parë që plumbat nuk e kapën, një tjetër ka zbritur nga makina dhe i është afruar duke qëlluar, por Inez Hajrulla është kundërpërgjigjur me zjarr.
Por një video e kamerave të sigurisë ka kapur momentin e largimit të autorëve të dyshuar të atentatit ndaj Inez Hajrullahut mesditën e së premtes në Vlorë.
Në video, shihet makina ‘Land Rover’ teksa largohet nga një rrugë dytësore pas atentatit ku mbeti i plagosur një person.
Policia e Vlorës dyshon se brenda mjetit janë tre persona të dyshuar si autorë.
Kush është Inez Hajrullah – Ai dyshohet si pjesë e grupit kriminal të përfshirë në dosjen e zhdukjeve të bujshme në qytetin bregdetar. Hajrullah në vitin 2017 mbeti i plagosur rëndë si pasojë e një atentati me eksploziv në makinë.
Poshtë pjesës së përparme të makinës që drejtohej nga i riu ishte vendosur një sasi rreth 300- 500 gramësh tritol.
Makina shpërtheu pasi mjeti kishte bërë vetëm pak metra pasi kishte dalë nga një lavazh. Lënda plasëse ishte e pajisur me fitil të lidhur me motorin e mjetin, i cili ka shërbyer edhe si ndezës. Shpërthimi ka qenë aq i fuqishëm sa mjeti ka ecur për inerci edhe rreth 70 metra të tjera dhe është përplasur me një makinë të dytë.
Ngjarja u shënua paraditen e 27 nëntorit 2017 pranë godinës së Institutit të Sigurimeve Shoqërore në lagjen ”Hajro Çakërri”, tek Bishti i Kalldrëmi në një kohë kur në zonë kishte kalimtarë të shumtë të cilët kanë kaluar momente paniku.
Sipas burimeve Hajrullahu humbi një këmbë për shkak të plagëve.
g.kosovari
