Presidenti i SHBA-ve, Joe Biden nuk i ndahet incidenteve. Rrëzimet e shpeshta në shkallët e avionit presidencial tashmë ia kanë lënë vendin atyre në evente publike.
Biden këtë të enjte u pengua dhe përfundoi i shtrirë barkas mbi podiumin në Kolorado, ku ishte ftuar që të shpërndante diplomat në një ceremoni diplomimi për Akademinë e Forcave Ajrore të SHBA.
Menjëherë pasi Presidenti ra në tokë, në ndihmë të tij erdhën zyrtarët e Forcave Ajrore, të cilët e suportuan që të ngrihej në këmbë dhe e shoqëruan drejt karriges ku duhej të ulej.
Besohet se incidenti u shkaktua prej lodhjes, pasi Biden kishte qëndruar në këmbë për rreth 1 orë e 30 minuta, në mënyrë që të shtrëngonte duart me secilin prej 921 kadetëve të diplomuar.
Sipas një raporti të shtypit të Shtëpisë së Bardhë, ai u pengua në një thes të zi me rërë që ishte vendosur për të mbajtur peshën e podiumit.
Pamjet e incidentit tregojnë vetë Biden që bën me gisht nga thesi me rërë, pasi është ngritur në këmbë, si për të treguar fajtorin.
“Ai është mirë“, shkroi në Twitter drejtori i komunikimit të Shtëpisë së Bardhë, Ben LaBolt, pak pas incidentit.
Ndërkohë, Biden u pa duke vrapuar përsëri drejt autokolonës së tij kur ceremonia përfundoi pak pasi u pengua duke u përplasur në podium.
Ky incident i radhës vjen në një kohë kur sondazhet sugjerojnë se shumica e votuesve amerikanë shprehin hapur shqetësimin e tyre për moshën e thyer të presidentit.
/a.r
