Urim e Arian Dobruna, babë e bir, janë rrahur brutalisht mbrëmjen e 22 majit në lokalin e tyre në Gjakovë. Problemet mes familjeve Dobruna e Pepaj, herën e fundit përfunduan me rrahje e lëndime serioze.
Mediat kosovare kanë publikuar pamje të mbrëmjes së 22 majit të këtij viti, në të cilat shihet se fillimisht Urim Dobruna kishte dalë nga lokali dhe shihet teksa sulmohet nga Shelbim Pepaj.
Dobruna kthehet brenda lokalit dhe pas pak sekondash shihet Arian Dobruna, djali i Urimit, pas tyre shihen Pashuk Pepaj, pjesëtar i Policisë së Kosovës si staf civil, jashtë detyrës zyrtare dhe djali i tij, Shelbim Pepaj, të cilët nisin ta sulmojnë edhe këtë të dytin.
Pamjet tashmë i posedon edhe Prokuroria e Gjakovës, ndërsa policia njofton se Pashuk Pepaj së bashku me djalin e tij janë arrestuar dhe ndaj tyre është caktuar fillimisht masa e paraburgimit.
Por, pak ditë më pas, Prokuroria në Gjakovë kërkoi që kjo masë t’i zëvendësohej dhe Pashuk e Shelbim Pepaj të dërgohen në arrest shtëpiak.
Pashuk e Shelbim Pepaj po mbajnë masën e arrestit shtëpiak në banesën, të cilën e kishin blerë nga Arian Dobruna e që është ngjitur me lokalin ne të cilin ndodhi sulmi i 22 majit.
/a.r
