“ABCNews” mëson se përveç makinës së atentatorëve, në vendngjarje është fiksuar nga kamerat e sigurisë edhe një tjetër makinë e bardhë, që kryen lëvizje të dyshimta dhe po verifikohet nga grupi hetimor si një mjet i dyshimte, brenda të cilës mund të kenë qenë persona që kanë pasur rolin e informatorëve.
Ky mjet, në kohën që makina “Toyota” e atentatorëve është e ndaluar me bllokazh në afërsi të rrethit në krahun e djathtë, qëndron nga ana tjetër, diagonalisht me të. Më pas, në momentin që autorët lëvizin dhe dalin nga krahu tjetër, makina e bardhë lëviz njëkohësisht me të dhe ndalon në vendin ku ata ishin më parë. Për pak sekonda të dy makinat shfaqen përballë njëra tjetrës.
Ndërsa në një moment, drejtuesi i mjetit të bardhë nxjerr dorën nga xhami dhe bën me shenjë nga atentatorët. Duket si një sinjal që u jep atyre për të qenë gati, pasi fiks në atë moment në pamje shfaqet makina “Mecedes” ku ishte objektivi i atentatit.
Në momentin që autorët fillojnë të qëllojnë, makina e bardhë nis të largohet dhe në një moment gati sa nuk përplaset me një mjet tjetër që po lëvizte paralelisht me të.
Kjo makinë e dyshimtë lëviz në drejtim të parkingut të Rinasit dhe nuk dihet ende me saktësi se çfarë drejtimi ka marrë pas ngjarjes. “AbcNews” mëson se grupi hetimor po verifikon edhe lëvizjet e saj, pasi ka dyshime se po ashtu ka qenë pjesë e planit të atentatit dhe lëvizjet, qëndrimi apo shenjat nuk mund të jenë thjeshtë një rastësi.
