Në operacionin “Snowmen” oficerëve të Policisë u është dashur të vrapojnë në borë për të kapur Ylber Gegën 45-vjec, Ylber Zllamin 36-vjec, Albert Ajdinin 27-vjec dhe Lonard Celën 37-vjec. 4 trafikantët po shkëmbenin drogën në afërsi të autostradës Tiranë-Durrës, në fshatin Domje te Qafa e Kasharit.
Fillimisht në këtë zonë kanë qenë dy automjete të cilat janë afruar me njëra-tjetrën.
Sapo kanë dalë nga makinat 4 trafikantët kanë ndërhyrë oficerët e policisë të cilët po qëndronin rreth 100 m më larg. Kur kanë parë oficerët, trafikantët janë përpjekur të largohen duke vrapuar, por janë arrestuar nga policët, të cilët dallohen në videon e policisë duke vrapuar.
Droga ishte fshehur në bagazhin e dy automjeteve në 10 thasë të zinj. Për shkëmbimin e drogës, policia kishte marrë më herët informacion, duke ndërhyrë në momentin që trafikantët janë takuar me njëri-tjetrin.
Policia
Policia e Tiranës ka përfunduar me sukses operacionin “Snowmen”, duke arrestuar në flagrancë katër shtetas e sekuestruar 60 kilogramë kanabis.
Të arrestuarit janë:
Ylber Gega, 45 vjeç, banues në Fushë Krujë.
Ylber Zllami, 36 vjeç, banues në Tiranë.
Albert Ajdini, 27 vjeç, banues në Tiranë.
Leonard Çela, 37 vjeç, banues në Tiranë.
“Shtetasit e lartpërmendur dyshohen se, në bashkëpunim me njëri-tjetrin, kryenin aktivitetin e kundërligjshëm të shpërndarjes së lëndës së dyshuar narkotike të llojit Cannabis Sattiva, në afërsi të autostradës Tiranë – Durrës pranë fshatit Domje, Qaf Kashari, shinat e trenit etj”, thuhet në komunikatën e policisë, e cila vijon:
Në bazë të informacioneve që disponoheshin, për këta shtetas se do bënin një shkëmbim të një sasie të konsiderueshme lënde të dyshuar narkotike Cannabis Sattiva, në zonën e Domjes pranë autostradës Tiranë – Durrës, janë organizuar shërbimet me qëllim kapjen ne flagrance te këtyre shtetasve, ku më konkretisht:
Janë konstatuar dy automjete, një “Ford” dhe një “Opel”, të cilat kanë ndaluar pranë njëra tjetrës me disa persona në brendësi të tyre, e më pas kanë kaluar në një fushë pranë shinave të trenit. Menjëherë është bërë ndërhyrja nga ana e policisë dhe është ushtruar kontrolli në automjetet e mësipërm, ku janë gjetur 6 thasë të zinj me lëndë të dyshuar narkotike të llojt Cannabis Sattiva, në pjesën e bagazhit dhe 4 thasë të tjerë në sediljen e pasme të automjetit tip “Ford”.
Në cilësinë e provës materiale janë sekuestruar:
– 58 kilogram e 600 gramë lëndë e dyshuar narkotike e llojtë Cannabis Sattiva
– 2 automjete (Ford dhe Opel)
– 6 aparate telefonik celular të markave të ndryshme
Materialet proceduriale i’u kaluan prokurorisë pranë Gjykatës së Shkallës së Parë Tiranë për veprën penale të ” Prodhimit dhe shitjes së lëndëve narkotike në bashkëpunim”, parashikuar nga Neni 283/2 i Kodit Penal. /ma.me
