Ndërsa kryeministri ka paraqitur tek presidenti vakancën për kryetarin e Bashkisë së Tiranës, bashkë me disa bashki të tjera në vend ku priten zgjedhjet, një pjesë e analistëve besojnë se në procesin e shkarkimit të Erion Veliajt janë shkelur procedurat ligjore.
Në një intervistë për TemA, analisti Ben Andoni thotë se Veliaj ka përpara një “det të madh” për të kaluar: akuzat e rënda me të cilat po përballet. Megjithatë, sipas tij, shkarkimi si kryetar bashkie nuk u mbështet mbi një proces të qartë ligjor.
Andoni analizon zhvillimet më të fundit lidhur me çështjen Veliaj, duke theksuar mënyrën se si sillen institucionet shtetërore dhe ato të drejtësisë në raste të tilla, si dhe pritshmëritë nga Gjykata Kushtetuese pas ankimimit të paraqitur nga Veliaj.
Pa marrë parasysh fajësinë apo jo të Veliajt, Andoni thekson se shteti ligjor ndërtohet mbi parime të qarta: prezumimin e pafajësisë, procesin e rregullt ligjor dhe barazinë përpara ligjit. Në rastin konkret, këto parime, sipas tij, u anashkaluan në momentin kur u firmos shkarkimi si Kryetar i Bashkisë.
Ai vëren se shkarkimi është bërë mbi bazën e një gjyqi publik, pa pritur vendimin e drejtësisë për vërtetësinë e akuzave, duke kujtuar se shpesh në Shqipëri gjyqi publik i ka paraprirë vendimit gjyqësor. Historia shqiptare, thekson Andoni, ka treguar se gjyqet publike kanë pasur gjithmonë ndikim të dëmshëm mbi vendimet gjyqësore. Sipas tij, kjo metodë e vjetër dëmton rëndë themelet e demokracisë dhe e zëvendëson drejtësinë me spektaklin. Ai sqaron gjithashtu se Veliaj dhe familjarët e tij përballen me akuza shumë të forta për korrupsion, për të cilat pritet të flasë drejtësia. Por kjo nuk e zhbën të drejtën e tij për prezumimin e pafajësisë.
