Krerët e shtetit kanë zhvilluar homazhet në “Varrezat e Dëshmorëve” , ku sot shënohet edhe 80-vjetori i Çlirimit të Shqipërisë.
Presidenti i Republikës Bajram Begaj, Kryetarja e Kuvendit Elisa Spiropali, Kryeministri Edi Rama, Ministri i Mbrojtjes Pirro Vengu, Kryetari i Bashkisë Tiranë, Erjon Veliaj së bashku me figura të tjera të politikës në vend kanë vendosur kurora me lule te monumenti “Nënë Shqipëri”.
Në 80-vjetorin e Çlirimit janë nderuar dhe përkujtuar të gjithë heronjtë që luftuan për Shqipërinë e lirë.
Monumenti “Nëna Shqipëri” është një statujë e rëndësishme dhe simbolike, e cila përfaqëson nderimin dhe kujtimin e dëshmorëve të atdheut që kanë luftuar dhe sakrifikuar për lirinë e Shqipërisë gjatë periudhës së Luftës së Dytë Botërore.
Monumenti u ngrit pas Luftës së Dytë Botërore dhe ka një rëndësi të veçantë në histori, pasi përmes tij kujtohet periudha e okupimeve të huaja që kaloi Shqipëria, fillimisht nën pushtimin italian prej 7 prillit 1939, dhe më pas nën pushtimin gjerman pas kapitullimit të Italisë në vitin 1943. Ushtria Nacionalçlirimtare e Shqipërisë luajti një rol të rëndësishëm në çlirimin e vendit, dhe në 29 nëntor 1944, Shqipëria shpalli çlirimin e saj me fitoren e forcave nacionalçlirimtare.
/a.r
