Një avion luftarak F-35 u përfshi nga flakët pas një rrëzimi në bazën ushtarake Eielson në Alaskë, por piloti arriti të shpëtonte i palënduar. Pamjet e publikuara tregojnë momentin kur avioni humbet kontrollin dhe përplaset në tokë, duke shpërthyer në flakë, ndërsa piloti zbret me parashutë.
Ende nuk është e qartë se çfarë e detyroi pilotin të braktiste avionin, por autoritetet ushtarake e kanë cilësuar incidentin si një ngjarje me “dëme të konsiderueshme”. Ai u dërgua në spitalin ushtarak Bassett Army Hospital për kontrolle mjekësore.
Koloneli Paul Townsend theksoi se siguria e personelit mbetet prioritet dhe se Forcat Ajrore të SHBA-së do të kryejnë një hetim të plotë për të shmangur raste të ngjashme në të ardhmen. Ai gjithashtu theksoi se piloti ishte duke kryer “procedura standarde” në momentin e incidentit.
F-35A, avioni më i ri luftarak i Forcave Ajrore, ka zëvendësuar modelet F-16 Fighting Falcon dhe A-10 Thunderbolt II. Vlera mesatare e këtij avioni është rreth 81 milionë dollarë, dhe aktualisht në bazën Eielson janë të stacionuar 54 avionë të tillë.
Ngjarja e fundit vjen pas një rasti të ngjashëm në shtator 2023, kur një F-35 u rrëzua në Karolinën e Jugut dhe piloti e braktisi avionin pa e ndalur. Incidenti shkaktoi një reagim të madh publik pasi avioni u shpall i humbur për 24 orë. Një hetim i ushtrisë konkludoi se piloti kishte dalë nga avioni pa pasur nevojë, duke e lënë të fluturonte i pambikëqyrur për 11 minuta para se të rrëzohej.
Forcat Ajrore të SHBA-së vazhdojnë hetimet mbi shkaqet e incidenteve dhe përpiqen të rrisin sigurinë e avionëve luftarakë në operacione.
