Aeroportet në të gjithë Britaninë e Madhe u zhytën në kaos mbrëmjen e së martës, pas problemeve me sistemin elektronik të kontrollit të pasaportave. Skenat e kaosit zgjatën deri në orët e para të së mërkurës, teksa punonjësit e Home Office u detyruan që kontrollet mbi detajet e udhëtarëve që mbërrinin në vend t’i kryenin manualisht.
Një zëdhënës i Home Office tha se “portat elektronike në aeroportet e Mbretërisë së Bashkuar u kthyen në funksion pak pas mesnate”.
“Kur inxhinierët tanë identifikuan problemin më të gjerë në rrjet në orën 19:44 të së martës mbrëma, sistemi rezervë u aktivizua brenda gjashtë minutave. Në asnjë rast nuk ka pasur rrezik për sigurinë kufitare dhe nuk ka pasur indikacione për aktivitete kibernetike keqdashëse”.
Problemi, i cili tani është rregulluar, ishte në bazën e të dhënave të sistemit të quajtur Border Crossing, i cili, u lançua tre vjet më parë dhe u kushtoi taksapaguesve britanikë 372 milionë paund.
Të gjitha aeroportet kryesore u prekën nga ndërprerja, duke përfshirë Gatwick, Stansted, Manchester, Bristol, Southampton, Edinburgh, Glasgow dhe Aberdeen.
Videot dhe fotot e postuara në rrjetet sociale tregonin radhë shumë të gjata në portat hyrëse të aeroporteve, çka risollën në kujtesë kaosin e shkaktuar nga grevat dhe mungesa e stafit gjatë sezonit të kaluar veror.
Sipas Sky News, udhëtarët mbetën të bllokuar për orë të tëra brenda avionëve pas uljes, ndërsa të tjerë u ankuan se vonesat i bënë ata të humbnin lidhjet me trenat dhe mjetet e tjera të transportit.
“Nuk na thanë asgjë. Nuk na dhanë ujë. Foshnjat po qanin”, përshkruan udhëtarët e prekur nga problemi me sistemin.
/a.r
Chaos at airports across Britain after nationwide border problem.
Sky News reports:
UK Border Force database is down#UK #Heathrow #England #Borderforce pic.twitter.com/0o07u6lhW2
— Babylon Bulletin (@BabylonBulletin) May 7, 2024
