Barazimi në javën e parë të fazës së dytë përballë Kamzës, nuk ishte sërish një lajm i mirë për Tiranën. Skuadra bardheblu mori vetëm një pikë nga ky takim. Kështu Tirana mbetet në kuotën e 9-të pikëve në kampionat, dhe ndan së bashku me Luftëtarin vendin e 7 dhe të 8 në renditje, ku Gjirokastritët gjithashtu kanë 9-të pikë, pas dhjetë javësh kampionat. Kështu skuadra bardheblu është 13 pikë larg vendit të parë dhe 5 pikë vendit të fundit. Edhe pse kampionati është i gjatë dhe deri në fund ende nuk mund të thuhet se çfarë do të ndodh, sërish vlen të shihet e shkuara.
Telesport ka bërë një vëzhgim, të situatës së Tiranës në 8-të sezonet e fundit, duke nisur nga ai i vitit 2010-2011 e deri te sezoni aktual, përjashto sezonin që skuadra luajti në Kategorinë e Parë (2017-2018). Sezoni 2016-2017 e gjente Tiranën në vendin e katër në renditje pas javës së dhjetë të kampionatit. Edhe pse ai është sezoni më i errët i historisë bardheblu, pasi në fund të tij do të zbriste nga kategoria, në dhjetë javët e para të atij sezonit, Tirana grumbullonte 17-të pikë dhe mbante vendin e katër në renditje.
Në sezonin 2015-2016, Tirana sërish ishte në pozita të mira në renditje në dhjetë javët e para të kampionatit. Skuadra bardheblu mbante vendin e katër me 16 pikë, pasi merrte 4 fitore, 3 barazime dhe 3 humbje në dhjetë javë. Më mirë ishte sezoni 2014-2015, pasi në dhjetë javët e para të kampionatit, ekipi bardheblu kryesonte renditjen me 21 pikë, ndërsa linte pas skuadra si Partizani, Kukësi, Skënderbeu etj. Në atë kohë, Tirana fitonte 6 takime, barazonte 3 dhe regjistronte vetëm 1 humbje.
Pozita më të dobëta në renditje gjatë këtyre nëntë viteve, Tirana i ka pasur gjatë sezonit 2013-2014, kur në javën e dhjetë të kampionatit, skuadra bardheblu ndodhej në vendin e parafundit të klasifikimit. Mirëpo në atë kohë, kampionati përbëhej nga 12 skuadra, ndërsa në dhjetë javët e para të Superligës, Tirana merrte 10 pikë, pra një më shumë se sezoni aktual.
Para sezonit të sipërpërmendur, Tirana e periudhës 2012-2013, mbante vendin e pestë në renditje, ndërsa në dhjetë javë kampionat grumbullonte 16 pikë. Në atë sezon kampionati përbëhej nga 14 ekipe. Në sezonin 2011-2012, ekipi bardheblu sërish ka pasur një ecuri pozitive në dhjetë javët e para të Superligës. Vendi i dytë në renditje me 23 pikë të grumbulluara, 7 fitore, 2 barazime dhe vetëm 1 humbje.
Në kampionatin e sezonit 2010-2011, Tirana ishte sërish në vendin e katër në renditje pas javës së dhjetë të kampionatit. Skuadra bardheblu grumbullonte në total 15 pikë, pasi fitonte katër takime dhe barazonte tre të tjera. Duke parë këto të dhëna, është e natyrshme të thuash që ky është sezoni më i dobët i kësaj dekade për skuadrën bardheblu. Madje më dobët edhe se sezoni kur ekipi zbriti nga Superliga, duke shëtitur për një sezon në Kategorinë e Parë të futbollit në Shqipëri.
