Një ditë pas votimit në parlament për ngritjen e komisioneve të Vettingut, kryeministri Rama ka deklaruar se ky është një moment historik. Gjatë një bashkëbisedimi me fermerët në Manëz, Rama deklaroi se marrëvëshja me PD-në ishte një marrëveshje për Shqipërinë. Kryeministri deklaroi se ka dëgjuar shumë teori konspirative, se tani që PS-PD bënë marrëvëshjen, se nuk do dënohet asnjë politikan, por shefi i qeverisë theksoi se pasi të krijohet drejtësia e re, politikanët që kanë bërë zullume do marrin dënimin e merituar
“Zhbllokimi i vettingut një moment historik, për të cilin luftuam shumë. Politika nuk i ka lënë vend vetes të jetë e besueshme, prandaj fillojnë teorite konspirative dhe muhabetet e rakisë, pas arritjes së marrëveshjes.Marrëveshja me PD-në ishte për Shqipërinë. Vendi sot është më e mirë se sa dje me këtë marrëveshje. Vetingu do ta pastrojë një herë e mirë drejtësinë. Kam dëgjuar se këta u bënë bashkë, askush nuk do dënohet etj. Vettingu nuk fillonte për shkak se PD kishte ikur nga parlamenti. Do të pastrojmë pallatin e drejtësisë nga gjykatës e prokurorë të korruptuar, pastaj do fillojë drejtësia e re, ku edhe politikanët që kanë bërë zullume do marrin dënimin e merituar. Reforma në drejtësi ka qenë objektiv që në fillimet e pluralizmit, prandaj zbatimi i saj është një hap historik.Më shkruante njëri sot në mëngjes se tani që u bë Vettingu, Saliu nuk do të arrestohet. Vettingu nuk ka lidhje më me ne, me partitë, prandaj nuk e donte PD”, deklaroi Rama.
Pavarësisht marrëveshjes, Rama u shpreh se PD vazhdon që të mbetet rrezik për vendin, prandaj kërkon 71 mandate për të formuar qeverinë vetëm.
Ndërsa përsa i përket marrëveshjes ai theksoi se sado të na votojnë nuk do të marrim aq vota sa të bëjmë ndryshimet Kushtetuese.
“PD u fut në zgjedhje, por ata janë ata që ishin, i njëjti kërcënim për vendin në kuptimin e qeverisjes. Nëse i jepni PS 71 mandate timoni i sigurt, nëse nuk i jepni 71, PS mund të ketë timonin, por kushedi sa mund të ketë në prehër dhe pa rrip sigurie. Nuk jemi më të mirët, por më të mirë nuk kemi parë.”, deklaroi Rama.
Ai ka thumbuar edhe Ben Blushin për deklaratat e djeshme në Kuvend. Rama tha se Blushi nuk ka fytyrë as për katundarë dhe as për punëtorë.
Rama tha se Blushi hyn te ata që e shohin Shqipërinë si kek, si byrek, si kadaif si tepsi dhe që duan pjesën e tyre.
“Ata të kadaifit janë mëtë rrezikshëm. Disa që flasin për popullin e kanë mendjen tek tepsia”, tha Rama me humor./javanews.al/a.ç
