Sot është dita e fundit për 11 mijë efektivë të policisë për të dorëzuar formularët e vetëdeklarimit brenda afatit 30-ditor.
I gjithë ky proces mbështetej në 3 kritere: pastërtinë e figurës, pasurinë dhe aftësitë profesionale. Në vlerësim kanë kaluar të gjithë punonjësit e Policisë së Shtetit, nga titullari deri tek punonjësi më i thjeshtë. Por, si ka rezultuar ky proces? Dhe çfarë pritet të ndodhë më tej?
Zv/ministri i Punëve të Brendshme, Julian Hodaj i sqaroi këto pyetje në një intervistë në studion e lajmeve të Top Channel.
Sot është afati i fundit i dorëzimit të formularëve. Si ka shkuar ky proces? A kemi shifra në përqindje deri më tani?
Deri tani procesi i ka përmbushur pritshmëritë tona. Shumica e punonjësve i ka dorëzuar formularët. Policia e Shtetit dhe Garda, duke qenë se kanë numra të mëdhenj, kishin parashikuar edhe struktura asistence për punonjësit. Procesi është mbyllur në Tiranë dhe rrethe. Për shifra të sakta do të flasim në ditët në vijim, pasi të bëjmë një analizë. Por, mund të them se 95%-98% e punonjësve e ka përmbyllur procesin e dorëzimit të formularëve.
Është folur përgjatë këtyre javëve për qindra efektivë që kanë dhënë dorëheqjen gjatë këtij procesi? Si qëndron e vërteta?
Dorëheqje ka gjatë gjithë kohës. Nuk kemi shifra të sakta se sa e kanë dhënë gjatë këtij procesi, por nuk besoj që është një numër i tmerrshëm dorëheqjesh. Gjithsesi, pas një analize mund të themi se sa ka ndikuar vetting-u. Pjesa dërrmuese e Policisë së Shtetit e ka dashur këtë proces, siç është vënë re nga konsultimet që kemi bërë. Theksoj se ligji nuk i paragjykon dorëheqjet.
Çfarë do të ndodhë me efektivët që dorëhiqen? A i shpëtojnë ata vetting-ut, pavarësisht dorëheqjes?
Ata që kanë dhënë dorëheqjen nuk janë më punonjës të Policisë së Shtetit, Gardës së Republikës apo SHÇBA-së, kështu që nuk mund t’i nënshtrohen këtij procesi. Vetting-u vlen vetëm për ata që janë në detyrë e duan të vazhdojnë në detyrë.
Kush do zërë vendet e atyre që janë larguar apo do të largohen pas vettingut? Do të ketë sërish testime?
Vakancat mund të plotësohen nga ish-punonjës ose nga Akademia e Sigurisë që ka kapacitete për të mbushur radhët.
Si do të vijojë tani procesi, që kjo fazë përfundon? Do të ngrihet fillimisht Komisioni i Jashtëm i Vetting-ut, që do drejtohet nga njerëz jashtë sistemit apo jo? Më pas si do të vijojë? Këto seanca a do të jenë të hapura për publikun?
Aktualisht po punohet me ngritjen e Komisionit të Jashtëm të Vetting-ut dhe Sekretariatit Teknik. Në datën 27 maj, bordi përzgjedhës, që është i përbërë nga 5 institucione, Ministria e Brendshme, Avokati i Popullit, Shërbimi Informativ Shtetëror, komisioneri për mbrojtjen nga diskriminimi dhe komisioneri për mbrojtjen e të dhënave personale, ka shpallur vakancat. 5 vende për bordin dhe 15 vende të Sekretariatit Teknik. 10 vendet e tjera të Komisionit të Jashtëm plotësohen nga ILDKPI dhe 10 propozime nga pedagogët që vijnë nga rektori i Universitetit të Tiranës. Kur plotësohen vakancat, ngrihen organet dhe nis funksionimi e vlerësimi. Komisioni i Jashtëm vlerëson gradat e larta, pra nis vlerësimi nga maja e zbret poshtë./TCH/a.m.
