Lëvizja Socialiste për Integrim ka zgjedhur sot kryesinë e saj të re me votim elektronik.
Kreu i LSI Ilir Meta në një prononcim për mediat ka deklaruar se, “Kryesia do të jetë në një angazhim të përhershëm dhe do të mblidhet sipas një kalendari të përcaktuar dhe do të mblidhet aq herë sa Sekretari i Përgjithshëm do të përcaktojë që ka rëndësi për t’u mbledhur”.
Duke folur për Opinionin e Komisionit të Venecias për Ligjin e Vetingut, Meta tha se, “presim që Gjykata Kushtetuese të japë gjykimin e saj sa më parë të jetë e mundur dhe më pas të ecet me implementimin e ligjit të Vetingut dhe gjithë reformës në tërësi në mënyrë që kjo reformë të ndihmoijë në hapjen e negociatave dhe në reformimin e sistemit gjyqësor në vend”.
Duke folur për Reformën Zgjedhore, Meta tha se, “LSI është tërësisht e vendosur për respektimin e rekomandimeve të OSBE-ODIHR për zgjedhjet transparente dhe të ndershme. Do të bashkëpunojëm shumë ngushtë me të gjitha forcat politike dhe ekspertët ndërkombëtarë””.
Lidhur me vendimin që pritet të marrë Këshilli i Ministrave të BE për hapjen e negociatave me Shqipërinë, Meta tha se, “Jemi para një vlerësimi të Këshillit të vendeve anëtare që shpresojmë të jetë në një linjë me vlerësimin pozitiv të Komisionit Evropian”./a.m.
