Komisioni ad hoc me 12 anëtarë ka vijuar këtë të martë në kryesinë e Kuvendit seancën dëgjimore me kandidatët për Komisionin e Pavarur të Kualifikimit dhe Komisionerët Publikë, në zbatim të ligjit të vettingut.
Komisioni, që ka përbërje të barabartë mazhorancë-opozitë(6+6), kryesohet nga deputeti i PS-së, Pandeli Majko, ndërsa Ulsi Manja, Bashkim Fino, Evis Kushi, Luan Rama dhe Mesila Doda janë përfaqësuesit e shumicës në komision. Pakica parlamentare është e përfaqësuar nga deputetët: Oerd Bylykbashi (zëvendëskryetar), Dhurata Çupi, Fatmir Mediu, Gent Strazimiri, Jorida Tabaku dhe Aldo Bumçi, anëtarë.
Komisioni i Pavarur i Kualifikimit, sipas ligjit të vettingut, do të bëjë vlerësimin e të gjithë gjyqtarëve dhe prokurorëve, pavarësisht nivelit dhe juridiksionit. Ai do të ketë një mandat të kufizuar pesëvjeçar. Anëtarët e tij do të jenë juristë, me një përvojë të gjatë (të paktën 15 vjeçare) si gjyqtarë, prokurorë, avokatë ose profesorë të së drejtës, por dhe që gëzojnë reputacion të lartë.
Vendimet e Komisionit mund të ankimohen nga subjekti i rivlerësimit ose Komisioneri Publik. Ankimi do të shqyrtohet nga Kolegji i Posaçëm i Kualifikimit pranë Gjykatës Kushtetuese.
I gjithë procesi i rivlerësimit do të kryhet nën mbikëqyrjen e vëzhguesve ndërkombëtarë, me qëllim rritjen e besueshmërisë ndaj procesit. Ata do të kenë akses në dosjet e gjyqtarëve dhe prokurorëve dhe do të mbikëqyrin të gjithë procesin vendimmarrës, duke e asistuar procesin në të gjitha shkallët dhe nivelet.
Me qëllim garantimin e procesit dhe parandalimin e korrupsionit brenda Komisionit dhe Kolegjit të Apelimit, anëtarët e tij do të kenë një trajtim të posaçëm për veten dhe familjen e tyre. Atyre do t’u garantohet edhe mbrojtje e posaçme nga shteti.
