Pas largimit të gjyqtarit Andi Çeliku, tërhiqen nga posti i tyre edhe gjyqtarët Evelina Qirjako dhe Guxim Zenelaj, anëtarë të Gjykatës së Lartë që në korrik të vitit 2017.
Ata kanë refuzuar për të vijuar të shërbejnë në sistemin e drejtësisë, duke shmangur kështu kalimin në skanerin e trefishtë të Vettingut, për ligjshmërinë e pasurive, pastërtinë e figurës dhe aftësitë profesionale.
Të dy gjyqtarët kanë njoftuar dorëzimin e mandatit të anëtarit të Gjykatës së Lartë, për shkak të mbarimit të mandatit, ndonëse sipas ligjit ata mund të qëndronin në detyrë deri kur të zëvendësoheshin. Edhe pse sipas ligjit, anëtarët mund të kërkonin të emëroheshin gjyqtarë në Gjykatën e Apelit, ata sërish nuk kanë preferuar të shërbejnë në drejtësi.
Evelini Qirjako u përzgjodh me anë të shortit për t’iu nënshtruar procesit të rivlerësimit, në datën 15.3.2019. Ndërsa Guxim Zenelaj, me shkresёn e datёs 30.04.2018, dërguar Komisionit, ka njoftuar se nuk ka paraqitur asnjë kёrkesё pёr t’u emёruar gjyqtar apeli dhe se ai ka filluar ushtrimin e veprimtarisë private nё profesionin e avokatit, regjistruar nё QKB nё datёn 16.03.2018. Zenelaj me datë 8.4.2019, i ka dërguar një shkresë Kёshillit tё Lartё Gjyqёsor, ku ka konfirmuar se ka hequr dorё nga statusi i magjistratit.
Në datë 25.4.2019, Këshilli i Lartë Gjyqësor ka dërguar pranë Komisionit të Vettingut vendimin për deklarimin e mbarimit të statusit të magjistratit, për ish-gjyqtarin e Gjykatës së Lartë, z. Guxim Zenelaj. Komisioni i Pavarur i Kualifikimit vendosi të ndërpresë procesin e Vettingut për Guxim Zenelajn në datën 1 korrik 2019.
