Kryetari i PD-së, Lulzim Basha, e ka vlerësuar si pozitiv vendimin e Gjykatës Kushtetuese, për të pezulluar ligjin e Vettingut dhe duke ja dërguar atë për opinion Komisionit të Venecias. Në një deklarim për shtypin pas mbledhjes së grupit parlamentarë të PD-së Basha u shpreh se PD është në pritje të hapave të tjerë. Ka qenë vetë PD e cila kërkoi pezullimin e ligjit të vettingut dhe shfuqizimin e tij ndonëse SHBA dhe BE ishin kundër padisë së PD-së në Gjykatën Kushtetuese të këtij ligji.
Kryetari i Partisë Demokratike nder te tjera e cilësoi si alarmante situatën e kultivimit të kanabisit dhe trafikimit të tij drejt vendeve fqinje. Duke iu referuar deklaratës së Ylli Manjanit për përdorimin e ushtrisë kundër kanabisit, Basha tha se edhe përfaqësues të mazhorancës e kanë kuptuar gjendjen ku ndodhet vendi. Ai theksoi se kush hesht përballë drogës, është indiferent ose i korruptuar.
“Është një simptomë e gjendjes ku ndodhet vendi. Anëtarë të kabinetit apo përfaqësues të mazhorancës, detyrohen të pranojnë atë që kemi thënë prej një viti, se Shqipëria është kthyer në një narkorepublikë. Kush hesht përballë kësaj, shqiptar apo i huaj, ka dy gjëra, indeferencë ose korrupsion. Ose është indiferent, ose është i korruptuar”, u shpreh Basha.
ma.me
