Ambasadorët e vendeve të BE-së po zhvillojnë një takim me drejtuesen e ONM Calavera në lidhje me zbatimin e vetting-ut. I pranishëm në këtë takim është edhe ambasadori i SHBA në Tiranë, Donald Lu. Takimi po zhvillohet në zyrat e BE-së në Tiranë. Ky takim vlerësohet se është mjaft vendimtar, po të kihet parasysh se kjo javë është shumë përcaktuese sa i përket procesit të vetting-ut në Kuvend. Ministri i Drejtësisë i LSI Petrit Vasili, që nga dita e parë e emërimit të tij e deri më tani, ka kundërshtuar bordin e ONM-së, me arsyetimin se ai është antikushtetues. Për këtë qëllim ai u ka dërguar edhe disa letra krerëve të shtetit dhe zyrtarëve të lartë të BE-së dhe atyre të SHBA në Tiranë. Ndonse Vasili ka marrë përgjigje se bordi i ONM nuk është antikushtetues, ai sërish vijon të ngulë këmbë në këtë argument, tashmë me karakter politik.
Një ditë më parë zyrtarë të lartë të BE-së bën të ditur në Tiranë se personazhe mjaft të fuqishëm politik dhe në sistemin e drejtësisë po përpiqen të zhvlerësojnë vetting-un. Takimi ambasadorëve vjen edhe në një moment kur PD ndodhet në rrugë duke protestuar duke kërkuar qeveri teknike. PD paralelisht me këtë kërkesë ka kërkuar edhe të rishkruhet Reforma në Drejtësi, duke bërë të qartë se është kundër 7 ligjeve që e bëjnë të zbatueshme reformën në drejtësi dhe sidomos kundër vettingut. Në këtë pikë PD është në sintoni të plotë me LSI. Në mbështetje të tyre është rreshtuar edhe presidenti Nishani.
me.ar
