Ministri i Brendshëm, Fatmir Xhafaj ka prezantuar në Komisionin e Sigurisë projektligjin për vettingun në policinë e shtetit.
Xhafaj theksoi se projektligji i Vetingut në Policinë e Shtetit, Gardë dhe SHKÇB synon pastrimin e tyre nga radhët e të inkriminuarve
Duke e cilësuar vettingun në polici është një domosdoshmëri, ministri Xhafaj bëri me dije se procesi i vlerësimit kontrollon figurën dhe pasurinë e punonjësve të policisë.
“Morëm në konsideratë analiza e raporte të institucioneve europiane, prokurorisë së përgjithshme, si edhe nga vetë punonjësit e e policisë. Qëllimi, krijimi i institucioneve të besueshme. Procesi i vlerësimit kontrollon figurën dhe pasurinë e punonjësve të policisë. Synimi ynë është promovimi i punonjësve të ndershëm. Ky proces duhet të jetë transparent dhe i paanshëm”, tha Xhafaj.
Më tej ai shtoi se procesit të vlerësimit do t’i nënshtrohen jo vetëm punonjësit e policisë në detyrë, por edhe ata ish-punonjës që janë larguar nga uniforma blu.
Ndërsa shtoi se i gjithë procesi do të monitorohet nga partnerët ndërkombëtar, PAMECA dhe IPAC.
“Një rol të rëndësishëm do kenë dhe partnerët ndërkombëtar, PAMECA dhe IPAC do monitorojnë gjithë procesin. Brukseli po shqyrton mundësinë e një prezence prej tyre për të ndjekur procesin, monitoruar dhe certifikuar hap pas hapi me standardet ndërkombëtare.
Do garantojmë standarde sa më të mira ndërkombëtare. Ata që mund t’i nënshtrohen procesit të Vetting-ut janë edhe ish policët e larguar, por që plotësojnë kriterin e gradës dhe që janë më pak se 47 vjeç Këta punonjës mund të rikthehen nëse janë larguar si pasojë e ristrukturimeve, por edhe me masën përjashtim, kur kjo është shfuqizuar nga gjykata. Objekt verifikimi do të jenë pasuritë, për profesionalizimin do verifikohen dokumentet, testimet akademike. Organet e vlerësimit do të ndërtohen në raport me sistemin gradave që kanë aktualisht.
Në fazën e parë, testimin ose vetimin për 300 punonjës nga një komision me 15 anëtarë. Faza e dytë, testimi për 3 mijë punonjës nga një komision me 45 anëtarë. Faza e tretë, 9 mijë punonjës, nga një komision me 135 anëtarë.
Vendimet që mund të merren: konfirmimi në detyrë, detyrimi për trajnim për ata që kanë probleme në formimin dhe aftësitë e tyre, emërimi në detyrë për ish-punonjësit që kalojnë testin e Vettingut, përjashtim nga detyra ata që nuk kalojnë testin e Vettingut.
Punonjësit që vetohen kanë gjithë të drejtat e një procesi të rregullt, për t’u vlerësuar në mënyrë të paanshme. Të dëgjohet në seancë dëgjimore dhe të mbrohet, apo dhe të ankohet para organeve gjyqësore për përjashtim nga detyra”, shtoi ministri Fatmir Xhafaj.
Xhafaj deklaroi se procesi do te jape një shtysë të re në luftën ndaj krimit.
a.ç
