Që nga nisja e seancave dëgjimore, në kuadër të procesit të vetingut në muajin mars të këtij viti dhe deri tani, në filtrat e drejtësisë kanë kaluar 51 subjekte, që janë gjyqtarë dhe prokurorë.
Këta, janë më së shumti kandidatë për Këshillin e Lartë të Gjyqësorit dhe Këshillin e Lartë të Prokurorisë, si edhe dy kandidatë për inspektorë. Gjithashtu, në listën prioritare të vetingut u përfshinë edhe anëtarët e Gjykatës së Lartë dhe ata të Gjykatës Kushtetuese, si dy nga gjykatat më të rëndësishme në vend dhe jetike për mbarëvajtjen e reformës.
Në listën e përparësisë u përfshinë edhe anëtarët e Këshillit të Emërimeve në Drejtësi dhe kandidatë për anëtarë të saj, institucion ky që përzgjedh gjyqtarët e Kushtetueses. Mirëpo, edhe pse KPK-ja vendosi ta rriste numrin e seancave këtë muaj për ta përfunduar listën prioritare brenda verës, duket se një gjë e tillë mund të jetë e mundur. Deri më tani, kanë mbetur edhe gjashtë subjekte që duhet të kalojnë në veting nga lista e përparësisë.
“Panorama” mëson se Komisioni do të zhvillojë seanca deri më datën 10 gusht dhe më pas mund të nisë pushimet. Një gjë e tillë të paktën ka ndodhur me Kolegjin e Posaçëm të Apelimit dhe duke qenë se Kolegji nuk është funksional, atëherë edhe KPK do të detyrohet të marrë pushimet, së bashku me ONM-në dhe Institucionin e Komisionerit Publik. Kështu, në faqen zyrtare të Kolegjit të Posaçëm të Apelimit njoftohet se seanca në Apel për çështjen e prokurores së Apelit të Shkodrës, Besa Nikëhasani, do të zhvillohet më datë 12 shtator.
“Ditën e mërkurë më datë 12.09.2018, ora 09:30, do të gjykohet në dhomë këshillimi çështja nr. 6/ 2018 (JR) datë 21.06.2018 për ankimin që subjekti i rivlerësimit znj. Besa Nikëhasani ka bërë kundër vendimit nr. 15, datë 20.04.2018 të Komisionit të Pavarur të Kualifikimit”, shkruan njoftimi.
Kjo do të thotë që nuk do të ketë seanca më në gusht nga ana e Kolegjit. Gjithashtu, kur drejtësia është në kolaps dhe pret ngritjen e KLGJ-së dhe KLP-së, duket se edhe këto institucione do të mbeten për t’u ngritur nga fundi i vitit. Kjo për shkak se ende nuk ka nisur puna për listën e dytë prioritare që do të kalojë në veting. Në këtë listë janë disa kandidatë për anëtarë të KEDit dhe shtatë kandidatë për Gjykatën Kushtetuese. Deri më tani, KED-i aktual që ka mandat deri në fund të vitit, ka mbetur me vetëm gjashtë anëtarë, ku nga këta, tre ishin zëvendësues.
KED-i është mjaft i rëndësishëm për drejtësinë, pasi zgjedh kandidatët e Gjykatës Kushtetuese dhe kërkon të paktën 5 anëtarë që të funksionojë. Nga ana tjetër, nga këta gjashtë anëtarë që ka momentalisht, vetëm dy kanë kaluar në veting dhe janë rikonfirmuar, ndërsa katër të tjerët janë në pritje dhe mjaftojnë që të ngelin dy që ta nxjerrin KED-in jofunksional dhe të çojnë në ngërç për plotësimin.
ma.me
