A janë vetëm Berisha dhe Topalli që janë deklaruar kundër vetingut nga ndërkombëtarët? Mesa duket jo. Zëra kundër duket se ka edhe nga LSI-ja, parti kjo e koalicionit qeverisës. Zëri i parë për këtë pakënaqësi vjen nga deputeti i LSI-së, Përparim Spahiu. Fillimisht, në një postim në faqen e tij në Twitter, Spahiu flet për rëndësinë e sovranitetit në përgjithësi, duke u fokusuar më pas tek cështja konkrete që lidhet me vetingun, për të cilën ai lë të kuptojë se e udhëhequr nga ndërkombëtarët do të çojë në një shkelje të sovranitetit të vendit.
“E kuptoj dhe jam dakord që sovranitetin e vendit tonë të përbashkët duhet ta ndajmë me NATO, me KE, shpresoj dhe me BE! Por nuk jam gati të votoj ndarjen e sovranitetit me Operacionin Ndërkombëtar të Monitorimit! Çfarë përfaqësojnë këta?!!”, – shkruan ai.
Por a duket kjo deklaratë e Spahiut një dalje nga rreshti? Ka pak gjasa të jetë e tillë. Kjo për faktin se në të gjithë praktikën e funksionimit të grupit parlamentarë të LSI-së, deklaratat janë tërësisht të kontrolluara jo vetëm në aspeketin mediatik nga foltorja e partisë, por edhe sa u përket qëndrimeve “private” në rrjetet sociale. A është ky një sinjal që edhe LSI është kundër vetingut? Duke parë dinamikën e zhvillimit të ngjarjeve dhe sidomos këmbënguljen e PD-së kundër vetingut, nuk është e vështirë për t’u kuptuar se kemi një sinkronizim në distancë mes PD dhe LSI rreth kësaj çështje, e cila po mban peng Reformën në Drejtësi.
Me. Ar
