Pas vetingut në sistemin e drejtësisë edhe ai i policisë duket se po ecën me ritme të shpejta. Drejtori i Departamentit të Kufirit dhe Migracionit, Eduart Merkaj doli ditën e djeshme përpara Komisionit të Jashtëm të Vlerësimit ku u njoh me rezultatet e hetimit të bërë për të që prej muajit qershor 2019 bazuar në 3 komponentët e vlerësimit, atë të pasurisë, pastërtisë së figurës dhe aftësive profesionale. Trupa e vlerësimit e përbërë nga Sonila Kadarej, Luljeta Qoku dhe Ledian Rusta konstatuan dhe deklaruan se nga hetimi administrativ i drejtorit të departamentit të Kufirit dhe Migracionit, Eduart Merkaj rezulton pa problem në të tre komponentët e vlerësimit, duke lënë të kuptohet se ai do të rikonfirmohet në detyrë.
Komisioni i Jashtëm i Vlerësimit do të mblidhet sërish të hënën më 13 janar, për të rikonfirmuar në detyrë drejtorin e Kufirit dhe Migracionit. Merkaj është pjesë e strukturave të Policisë së Shtetit që prej vitit 2007 teksa ka mbajtur disa poste të rëndësishme ndërsa prej janarit të vitit 2019 drejton departamentin e Kufirit dhe Migracionit.
Në total do të kalojnë në filtrat e vetingut 13 mijë punonjës të Policisë së Shtetit, për çdonjërin prej të cilëve sipas ligjit, do të mbahet seancë e hapur dëgjimore për mediat dhe qytetarët. Në dy fazat e tjera të vetingut, dosjet e efektiveve blu do të shqyrtohen nga drejtuesit e Shërbimit për Çështjet e Brendshme dhe Ankesave dhe ata të Policisë së Shtetit, të cilët kanë kaluar me sukses fazën e parë të vetingut. Ata që nuk do të kalojnë dot filtrat, shkarkohen për të mos u kthyer më në polici, ndryshe nga vetingu në drejtësi që ka një limit kohor që gjyqtarët apo prokurorët mund të riaplikojnë përsëri. Ndërkaq, ende nuk ka një datë konkrete se kur pritet të përfundojë vetingu në radhët e policisë, përveç limitit deri në qershorin e 2020 kur pritet të kenë përfunduar të gjitha shqyrtimet për 245 dosjet e drejtuesve më të lartë.
/a.r
