Reforma në drejtësi pritet që të shkaktojë tërmet në gjyqësor dhe në politikën shqiptare. Sinjalet e ditëve të fundit janë se shumë gjyqtarë e prokurorë i kanë nxjerrë jashtë paratë e tyre. Për këtë arsye, ILDKP dhe Drejtoria e Pastrimit të Parave janë duke verifikuar. Mirëpo një verifikim më i detajuar do të nisë kur të marrin dosjet në dorë anëtarët e komisioneve të vetingut dhe kur të ngrihet Struktura e Posaçme Antikorrupsion.
Ndërkombëtarët po i kushtojnë një rëndësi të madhe pastrimit të parave dhe për këtë arsye përveçse do ketë arrestime VIP, aty ku pasuria është e pajustifikuar, ajo do sekuestrohet. Mirëpo sipas deklaratave të ILDKP dhe të dhënave të DPPPP, ka shumë persona që i kanë nxjerrë jashtë paratë. Për këtë arsye, SPAK dhe organet e vetingut do të bashkëpunojnë me disa organizata dhe shtete partnere. SPAK fillimisht do të operojë në bazë të marrëveshjeve që shteti ynë ka aktualisht me shtetet e tjera, por që më pas ato do të ndryshojnë, ku do ketë më shumë shkëmbim informacionesh.
Janë plot 15 shtete me të cilat SPAK do të lidhë kontakte dhe duke bashkëpunuar do mundet që të gjenden paratë e korrupsionit, si dhe do zhvillohen hetime për krimin e organizuar, shkruan gazeta SOT. Shumë krerë bandash ndodhen jashtë vendit dhe falë këtyre marrëveshjeve, ata do synohet që të gjenden. Nga ana tjetër do shfrytëzohen të gjitha marrëveshjet shumëpalëshe që ka firmosur vendi ynë, që janë rreth 17 të tilla. Në SPAK do ketë një drejtori të posaçme që do merret me bashkëpunimin ndërkombëtar dhe lidhjen e marrëdhënieve. Lista e shteteve është bërë publike nga EURALIUS, duke treguar dhe një herë se BE e ka marrë seriozisht reformën dhe duket se askush nuk do i shpëtojë hanxharit të saj. Kushdo që ka vjedhur paratë e qytetarëve do duhet që të japë llogari dhe t’i kthejë ato mbrapsht.
Misioni EURALIUS në faqen e tij zyrtare ka publikuar një listë me të gjitha shtetet që Shqipëria ka marrëveshje bashkëpunimi dhe që do të shfrytëzohen në kuadër të reformës në drejtësi. Bëhet fjalë për 15 vende, si Greqia, Italia, Gjermania, Rumania, Kroacia, etj. Me këto vende, shteti ynë ka lidhur marrëveshje bashkëpunimi në fushën penale dhe ka koordinim për raste të ndryshme. Por me miratimin e reformës korrespodenca do i kalojë SPAK dhe pritet që disa marrëveshje të rishikohen, ku do forcohen një sërë elementesh, sidomos në fushën e sekuestrimit të parave të pista. Me ligjin e ri antimafia që do miratohet, të gjitha paratë dhe pasuritë kriminale brenda dhe jashtë vendit, do sekuestrohen. Për këtë arsye do të duhet dhe ndihma e tyre, me qëllim gjetjen dhe bllokimin.
Përveç bashkëpunimit me shtete të ndryshme të BE dhe jashtë saj, një bashkëpunim të thellë do të ketë me organizmat ndërkombëtare të drejtësisë dhe ligjit. Në kuadër të reformës në drejtësi do të ketë një bashkëpunim me DEA amerikane. Shumë institucione në vend kanë nënshkruar marrëveshje me këtë agjenci dhe ajo pritet që të zbatohet. Nga ana tjetër, gazeta ka siguruar një dokument të publikuar nga EURALIUS, ku jepen konkluzionet e vizitës së një delegacioni kroat në vendin tonë, disa muaj më parë.
Sipas asaj që thuhet aty, SPAK do ndjekë modelin e prokurorisë kroate antikorrupsion, e njohur si USKOK. Një ndër përfaqësuesit e saj ka thënë se kjo prokurori sapo u ngrit lidhi marrëveshje me disa institucione të rëndësishme si Interpol, Europol, Eurojust dhe rrjeti Gjyqësor Evropian, si dhe me agjencitë ligjzbatuese si Carin, Aro, Egmont Group. Aty theksohet se dhe vendi ynë do duhet që të ndjekë këtë rrugë, që do të thotë do ketë asistencë nga këto agjenci me qëllim gjetjen e parave të krimit dhe korrupsionit.
