Gjykata Kushtetuese ka rrëzuar kërkesën e ish-kryetarit Bashkim Dedja për shfuqizimin e sekuestrimit të pasurive.
Kujtojmë se më 10 qershor, Prokuroria e Posaçme kundër Korrupsionit dhe Krimit të Organizuar, SPAK, kërkoi konfiskimin e një apartamenti të ish-kreut të Gjykatës Kushtetuese.
Kërkesa e SPAK-ut u bazua në ligjin anti-mafia, teksa mësohet se apartamenti është në emër të vëllait të ish-gjyqtarit.
Dedja aktualisht po përballet me drejtësinë, për shkak të akuzave për deklarim të rremë dhe fshehje të pasurisë.
Disa pasuri të tijat, sipas hetimeve, nuk justifikohen ligjërisht.
Kërkesa e SPAK-ut ndërkaq është pranuar nga gjykatësi i Posaçëm, Erjon Bani, i cili e ka kaluar për gjykim dosjen penale ndaj ish-zyrtarit të lartë.
Gjatë shpalljes së vendimit, gjyqtari Bani argumentoi se për dy apartamente dhe një garazh në pronësi të Dedjas nuk janë siguruar prova.
Ndërsa, për burimin e krijimit të një apartamenti, ai duhet t’i nënshtrohet gjykimit në themel.
Dedja në gjykim
Gjykata e Posaçme Kundër Korrupsionit dhe Krimit të Organizuar të martën e 10 majit pati marrë në shqyrtim dosjen e ish-kryetarit të Gjykatës Kushtetuese Bashkim Dedja.
Dedja do të gjykohet për deklarim të rremë dhe fshehje pasurie.
Më 3 gusht Prokuroria e Posaçme (SPAK), pas përfundimit të hetimeve për mosdeklarim dhe fshehje pasurie dërgoi për gjykim dosjen e tij në GJKKO.
Bashkim Dedja akuzohet për kryerjen e veprës penale, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Më 28 prill me kërkesë të SPAK-ut, GJKKO-ja sekustroi pasurinë e Dedjas. Këtij të fundit iu sekuestrua një apartament 60 m2 në Golem.
Hetimet për Dedjan nisën që në maj të vitit 2020.
Nga hetimet e SPAK-ut rezultoi se ish-kreu i Kushtetueses kishte në pronësi pasuri të paluajtshme, të cilat nuk i justifikonte dot.
Procesi i vetting-ut
Në dhjetor të vitit 2018, Dedja nuk e kaloi me sukses fazën e Vetting-ut. Ai u shkarkua nga Kolegji i Posaçëm i Apelimit me arsyetimin se nuk justifikonte pasurinë e tij dhe nuk shpjegonte burimin e të ardhurave financiare.
Rrjedhimisht KPA-ja hodhi poshtë vendimin e Komisionit të Pavarur të Kualifikimit për konfirmimin në detyrë të Dedjas.
Ai u konfirmua në detyrë në dhjetor të vitit 2018 nga KPK-ja, megjithëse gjatë hetimeve administrative, u vërejtën një sërë shkeljesh në deklarimin e pasurisë.
Fill pas vendimit, Operacioni Ndërkombëtar i Monitorimit e kundërshtoi KPK-në, duke kërkuar nga Komisioneri Publik që të ankimonte në KPA.
Në korrik 2018, Komisioneri apeloi vendimin në KPA./m.j
