Vetëvritet babai i 2 fëmijëve, do t’i mbyllej biznesi se nuk kishte kasë
Një 31-vjeçar i cili kishte një servis në zonën e Kombinatit në Tiranë i ka dhënë fund jetës pas kontrollit nga policia dhe inspektorët e tatimeve për kasën fiskale.
Ngjarja ka ndodhur më datë 18 shtator 2015, rreth orës 18.30, në rrugën “Besim Alla“, në servisin e marrë me qira, nga shtetasi Elsion Nonaj.
Aty është gjetur i vdekur shtetasi 31-vjecar, banues në Tiranë. Ai mendohet se i ka dhënë fund jetës pasi ka përcjellë punëtorët që e ndihmonin dhe klientët si dhe ka ulur qepenat e servisit.
Dëshmitarë të zonës dhe banorët thonë se pak orë para ngjarjes policia dhe inspektorët e tatimeve e kanë paralajmëruar viktimën, baba i dy fëmijëve, se do të arrestohej dhe do t’i mbyllej biznesi në rast se të nesërmen gjendej pa kasë fiskale.
Policia ka thënë se nga veprimet e kryera rezulton se shkaku i vdekjes ka qenë goditja nga rryma elektrike. Dosja i ka kaluar Prokurorisë Rrethit Gjyqësor Tiranë, për vlerësim por mësohet se nga këqyrja në vendngjarje, ka rezultuar se kabllot që ka prekur viktima janë shkëputur dhe zhveshur prej tij me qëllim kryerjen e vetëvrasjes.
