Një vit nga arrestimi Qamil Zelës, 52-vjeçarit që u vetëflijua në qelinë e burgut për borxhin prej 3800 lekësh, dorëzohet në gjykatë kallëzimi për tri institucione.
Familja e Zelës nga Lushnja ka kërkur që të dalin përgjegjësit për ngjarjen që çoi në vetëvrasjen e kryefamiljarit, dy muaj pas prangosjes, në qelintë e burgut të Rrogozhinës.
Çështja e Zelës është ndjekur nga avokatët, të cilët depozituan kallëzimin penal dhe civil karshi Prokurorisë, Drejtorisë së Përgjithshme të Burgjeve dhe Gjykatës. Sipas tyre, dy muaj pas arrestimit për një debi që OSHEE pretendonte prej 3800 lekësh, Qamil Zela i ka dhënë fund jetës në ambjentet e burgut.
“Pasi për këtë ngjarje organi i akuzës nuk gjeti asnjë përgjegjës, madje i riktheu në vendet e punës të akuzuarit, e vetmja rrugë për të çuar në vend drejtësinë morale është ajo e kallëzimit civil. Të tri këto institucione kanë përgjegjësi për humbjen e ejetës së një njeriu, pasi asnjëra prej tyre nuk mori masa për të parandaluar vetëflijimin. Qamil Zela ishte person pa precedent dhe pësoi traum kur u izolua për dy muaj rresht”, thuhet në kallëzimin e dorëzuar në Gjykatën e Tiranës. Sipas këtij kallëzimi, Zela kishte nevojë për ndihmë mjekësore, por u neglizhua. Pavarsiht të depozitimit të kallëzimit civil, nuk ka një shumë të caktuar për dëmshpërblim, pasi pritet që gjykata të vendos për këtë në lidhje me pasojat që i janë shkaktuar familjes Zela pas humbjes së kryefamiljarit.
Panorama
