Ofendimet vijojnë të jenë kryefjalë e fushatës elektorale në Kosovë. Ramush Haradinaj nga Aleanca për Ardhmërinë e Kosovës kërkon llogari nga kryeministri Albin Kurti për qeverisjen e keq, ndërsa kreu i LDK-së, Lumir Abdixhiku thotë se hallet e popullit nuk zgjidhen me ofendime. Atyre iu përgjigj nënkryetari i Vetëvendosjes, Glauk Konjufca.
“Kurti duhet të jep llogari për gjithçka që ka bërë, ky nuk po na jep llogari vetëm po na shan… Iu kam ndarë tokë për varreza qytetarëve të Gjilanit, edhe ata tokë ua ka marrë tokën dhe nuk kanë ku t’i varrosin qytetarët e Gjilanit. Kryetari i Gjilanit është VV, po gjilanasit nuk flasin mirë për të”, u shpreh Ramush Haradinaj, kryetar i AAK.
“Pse je në pushtet i rrethuar me përcjellës e autokolonë veturash, nuk do të thotë se rryma është më lirë në Evropë dhe ti vështron sesi çmimet rriten, e ti vështron sesi punët nuk hapen e ti mashtron. Tabelat qeveritare nuk bëjnë sofra familjare. Faturat e dimrit nuk mbulohen me shpërthime euforike të piskamave elektorale. Hallet e popullit nuk zbuten me ofendime elektorale, e problemet e qytetarëve nga shkolla, shëndeti, rruga, rroga nuk tjetërsohen me ndërtimin e luftërave imagjinare”, tha Lumir Abdixhiku, kryetar i LDK.
“A i keni parë partitë tjera politike i kanë vendosur nëpër lista të zgjedhjeve kryetarët e komunave. Vetëvendosje i ka 6 anëtarë të komunave. A kishim mund edhe ne t’i vendosim. Shumë lehtë ka qenë dhe secilin që po e pyesim po thonë – jo s’do të shkoj në Parlament do të qëndrojë. Çka është ky mashtrim kështu? Kjo është sikur të porositësh miell e të të del byk”, u shpreh Glauk Konjufca, Nënkryetar i VV.
