Nuk mbarojnë akuzat e Vetëvendosjes. Këtë herë debaton hapur me strukturat e BE-së dhe SHBA. Ata janë shprehur se problemi qëndron te dështimi i EULEX, jo te themelimi i Speciales. Sipas Vetëvendosjes: Gjykata Speciale e paralelizon sistemin gjyqësor kosovar.
“Bazamenti i kësaj Gjykate është njëanshmëria. Krimet masive i ka kryer Serbia në Kosovë, kurse shqiptarët po përfundojnë me një tribunal special për UÇK. Këto janë disa çështje që u diskutuan në tryezën e Grupit parlamentar të Lëvizjes Vetëvendosje për politikën e jashtme të Kosovës në rajon, me shtetet e strukturat e Bashkimit Evropian dhe SHBA, dhe në raport me vendet anëtare të Këshillit të Sigurimit në kushtet e kërkesës për krijimin e Gjykatës Speciale sipas Rezolutës së Këshillit të Evropës bazuar në raportin e Senatorit Dick Marty. Në këtë tryezë, përpos deputetëve të Lëvizjes Vetëvendosje morën pjesë edhe përfaqësues nga Aleanca për Ardhmërinë e Kosovës, nga Nisma për Kosovën, nga organizatat e shoqërisë civile dhe profesorë të së drejtës dhe njohës të fushës së drejtësisë”, u tha në deklaratën e tyre.
Kurse kryetari i Grupit Parlamentar, Glauk Konjufca, tha se kjo Gjykatë është e njëanshme dhe madje e përmbysë realitetin historik.
