Fryrja e listave të veteranëve të Ushtrisë Çlirimtare të Kosovës është shqetësim i vazhdueshëm për veteranët dhe invalidët e luftës. Ata kanë kërkuar që të mbyllet komisioni qeveritar për verifikimin e statusit të veteranëve të UÇK-së.
Kryetari i Këshillit për Mbrojtjen e Veteranëve të UÇK-së, Xhevdet Qeriqi ka thënë për Tribuna Channel, se është përgjegjësi e Qeverisë rritja e numrit të aplikuesve për statusin e veteranit apo invalidit, ngase kjo po ndikon dhe dëmton buxhetin e ndarë për këto kategori.
Ai shpreh shqetësimin e tij se aplikimi për të fituar statusin ka qenë pa kurrfarë kritere.
Nga ana tjetër ministri i Punës dhe Mirëqenies sociale, Arban Abrashi është deklaruar për Tribuna Channel se pastrimi i listave merr kohë ngase ky proces është i ndërlikuar dhe me këtë duhen të merren organet e drejtësisë ngase qeveria e ka të pamundur të ndërhyjë në këtë proces.