Një ngjarje e rëndë është regjistruar në orët e para të mëngjesit të sotëm në qytetin e Shkodrës, ku një 30-vjeçar është paraqitur i plagosur në Spitalin Rajonal të qytetit, duke alarmuar autoritetet.
Sipas burimeve zyrtare nga Policia, shtetasi A. L., 30 vjeç, dyshohet se është vetëplagosur me armë zjarri rreth orës 07:30. Menjëherë pas njoftimit, shërbimet policore dhe grupi hetimor janë vënë në lëvizje dhe kanë mbërritur në vendin e ngjarjes.
Gjatë veprimeve të para hetimore, është gjetur arma e zjarrit e llojit automatik, që dyshohet të jetë përdorur në vetëplagosje. Ndërkohë, i plagosuri po merr trajtim mjekësor dhe ndodhet nën kujdesin e mjekëve.
Policia ka nisur hetimet për të zbardhur rrethanat e plota të ngjarjes, përfshirë mënyrën e sigurimit të armës, arsyet që çuan në vetëplagosje si dhe nëse janë të përfshirë persona të tjerë.
