Kryeministri Edi Rama tha sot se nuk do të bëhet mburojë e askujt që ka hesape me drejtësinë.
Ai solli rastin e Sali Berishës dhe Arben Sefgjinit, kur ky i fundit ishte drejtor i Tatmeve dhe drejtonte nga arresti shtëpiak incitutionin në fjalë.
“Unë nuk jam si ai në majë të ballkonit që mbante drejtor Tatimesh, një në arrest shtëpiak, që firmoste dhe drejtonte nga kuzhina” – tha Rama.
Ai hodhi akuza mbi Prokurorinë e Tiranës teksa tha se nuk po lufton evazionin fiskal.
“Prokuroria e Tiranës vijon të mbrojë evazionin fiskal,. Janë mbi 80 raste, se kam humbur edhe numërimin tani. Ka edhe raste të atyre që quhen oligarkë” – tha kryeministri.
Rama tha se kushdo që ka gabuar duke shfrytëzuar detyrën e tij për përfitime personale, duhet të cilësohet si “tradhëtar i dyfishtë” dhe të luftojë vetë në SPAK për shkeljet që ka kryer.
“Unë kam pasur detyrën të punojë në 10 vjet me 40 e ca ministra dhe të gjithë ata e kanë dëgjuar prej meje që prej ditës së parë se kush Lufton për të mirën e përbashkët më ka në krah në çdo hap edhe kur sulmohet. Por kush gabon duke kujtuar se do bëjë një rrugë e dy punë, nga njëra anë duke luftuar me mua dhe PS për të mirën e përbashkët dhe nga ana tjetër duke punuar fshehurazi për xhepin, nuk do më ketë në krah as mua dhe as PS. Vetëm avokatin e vetë para drejtësisë.
Jo po PS duhet t’i mbajë njerëzit dhe ti nuk duhet t’I lëshosh njerëzit e tu. Unë nuk lëshoj vetëm djalin e vogël dhe ndonjë shkëmb në det ku do të hidhet. Por nuk mbaj asnjë burrë me para të vjedhura në karrige kur vjen ora të thirret. Jo po nuk kam bërë asgjë, më bien në qafë. Nëse nuk ke bërë gjë nuk të mbaj as unë as PS por e vërteta. Prandaj lufto për të vërtetën tënde sepse unë dhe PS nuk bëjmë asnjë koment për çështje që hap SPAK për deputet, kryebashkiak apo ministër”– u shpreh Rama.
Ai theksoi se gjatë punës që ka pasur me ministrat e ndryshëm të kabinetit të tij qeverisës, ua ka bërë të qartë se nuk do të ketë asnjë lloj mbrojtje nëse ngatërrojnë të mirën e përbashkët me atë personale.
“Në 40 e ca ministra që kanë punuar me mua, ai grusht ministrash socialist që janë nën hetim, procese në vazhdim, dënime, nuk janë larguar nga SPAK, por nga unë. Por ti bësh sot të gjithë pis, ti quash të gjithë hajdutë, duke marrë disa shembuj të drejtësisë që jemi ne që krijuam kushtet që ata shembuj të krijohen, si argumetn për të përbaltur një punë kolosale, rezultate të gjithëpranuara, është një histeri e denjë për studime psikologjike. Unë skam qenë ndonjëherë mbulesë e ndonjë ministri. E kundërta është e vërtetë. U kam thënë mos e ngatërroni kurrë punën e përbashkët dhe shoqërinë që na lidh privilegji për të punuar për vedin, me asnjë dërrasë të kalbur ku mund të shkelni. Nuk jam unë dhe PS që e lëshon atë që i dridhet toka nën këmbë, por është ai që e ka lëshuar PS-në. I dëgjoj kur përsërisin pa pushim me shpoti të madhe “s’ka mundësi të mos i dijë Rama horlliqet e x apo y”. Nuk e kanë haberin si funksionon pushteti ekzekutivi. Nuk ekziston që një anëtar i një kabineti qeveritar të shtrëngohet për të vendosur kundër bindjes së tij. Nuk ka pasur asnjë mëdyshje për t’ia lënë drejtësisë fatin e hapur nga SPAK”- shtoi kryeministri.
/a.r
