Autoritetet izraelite kanë arrestuar dy ushtarakë rezervistë me akuzën se i kanë ofruar Iranit informacione të klasifikuara, veçanërisht në lidhje me sistemin e mbrojtjes Iron Dome.
Sipas mediave dy të dyshuarit, Yuri Ilyasivov dhe Georgi Andreev, rreth njëzet vjeç, kanë pranuar akuzat e ngritura ndaj tyre. Ata kanë rrëfyer se do të merrnin shpërblim financiar në këmbim të informacionit sensitiv, duke ia transmetuar të dhënat Teheranit.
Hetuesit dyshojnë se Ilyasifov i dërgoi një agjenti të huaj një video të “Kupolës së Hekurt” të marrë gjatë shërbimit të tij ushtarak, duke theksuar se ai ishte në vështirësi financiare.
Sipas hetimit, Ilyasifov ra në kontakt me një iranian përmes mediave sociale ndërsa kërkonte punë, dhe më pas e bindi Andreev që ta ndihmonte me premtimin se do të përfitonte financiarisht.
Sipas asaj që arritën të zbardhin hetuesit izraelitë, Ilyasifov do të merrte 2500 dollarë, ndërsa Andreev vetëm 50 dollarë.
