Nga Eduard Zaloshnja
Para një dekade hartova dhe drejtova një sondazh rigoroz opinioni me 1200 të anketuar në gjithë vendin për fondacionin gjerman Konrad Adenauer Stiftung. Fokusi ishte në veçanti tek opinioni i shtresave të ndryshme të Ish-të Përndjekurve Politikë.
Nga ai sondazh rezultoi se vetëm gjysma e pasardhësve të familjeve të persekutuara gjatë regjimit komunist votuan për PD-në në zgjedhjet e 2013-ës. Gjysma tjetër ose votoi për parti të tjera ose nuk votoi fare.
Vijmë në ditët e sotme.
Në pranverë hartova dhe drejtova një sondazh rigoroz opinioni me 1100 të anketuar në gjithë vendin për fondacionin gjerman Friedrich Ebert Stiftung. Fokusi nuk ishte në veçanti tek opinioni i shtresave të ndryshme të Ish-të Përndjekurve Politikë, por kishte edhe pyetje rreth tyre.
Nga ai sondazh rezultoi se vetëm 40% e pasardhësve të familjeve të persekutuara gjatë regjimit komunist donin të votonin për PD-në në zgjedhjet e ardhshme. Pjesa tjetër ose donin të votonin për parti të tjera, ose ishin të dyzuar, ose nuk nuk donin të votonin fare.
Sa më sipër na jep idenë e një tabloje laramane për sinorin elektoral të PD-së. Në të rrinë bashkë ish-të persekutuar nga komunistët dhe ish-komunistë; përkrahës krahinorë dhe përkrahës pragmatistë; ish-zyrtarë të rënë nga kali dhe të tjerë që shpresojnë të hipin rishtas në kalë.
Sidoqoftë, pa një përkrahje masive të pasardhësve të familjeve të persekutuara gjatë regjimit komunist, PD-ja nuk ka shans t’i afrohet murit elektoral 800-mijësh të Ramës, që e ka ngritur këtu qysh kur erdhi në krye të PS-së. Për të mos folur për murin elektoral që po ndërton në emigracion…
