Të rinjtë po zgjedhin gjithmonë e më shumë të vaksinohen kundër Covid-19. Edhe pse 70-vjeçarët janë kategoria që mban përqindjen më të madhe të të imunizuarve, së fundmi është parë një trend rritës edhe tek personat mbi 18 vjeç.

“Grupmosha që ne vlerësojmë që është 18-30 vjeç ka pësuar rritje, jemi 34% me dozën e parë gjë që është shumë e mirë dhe po rritet gradualisht gjatë kësaj periudhe”.

Shatori është muaji i dytë i hapur për vaksinimin masiv të popullatës ndaj Covid-19. Ekspertët e Institutit të Shëndetit Publik thonë se mbulesa vaksinale po rritet por ende ka nevojë për ndërgjegjësim.

“Jemi në fazën që me të paktën një dozë është vaksinuar rreth 42% e popullsisë sonë target, pra ato mbi 18 vjeç dhe me dy doza janë rreth 33%, pra dhe doza e dytë është duke ndjekur ritmin e dozave të para”.

Zona e jugut të vendit i është përgjigjur më shume apelit të ekspertëve për t’u vaksinuar.

“Kryesisht qarqet me mbulesë më të lartë janë qarqet e jugut, duke filluar me Gjirokastrën, Berati, Fieri, Korça dhe Vlora”.

Shqipëria po imunizon popullatën mbi 18 vjeç me tre lloje të vaksinave, që janë Pfizer, AstraZeneca dhe Coronavac.

Ekspertët e vaksinimit thonë se shqiptarët kanë një tendencë për të kërkuar Pfizer si vaksinë preferenciale edhe pse përcaktimi i llojit të vaksinës bëhet nga mjekët dhe jo nga individi.

Që prej fillimit të vaksinimit në Janar deri më tani në vend janë injektuar mbi 1 milionë e 690 mijë vaksina prej të cilave rreth 760 mijë qytetarë i kanë marrë të dyja dozat.