Kryetari i Kuvendit të Kosovës, Kadri Veseli ka bërë të ditur se seanca e jashtëzakonshme do të vazhdojë nesër (të mërkurën) në orën 14:00, pasi bojkoti dhe mungesa e gatishmërisë së opozitës ka krijuar edhe një situatë të mungesës së konsensusit të marrjes së vendimit për ekipin negociator në dialogun me Serbinë në Bruksel.
Në një konferencë për mediet pas dështimit të seancës së sotme për miratimin e delegacionit qeveritar për dialogun me Serbinë, ai foli edhe sa i përket deklaratës së shefit të grupit parlamentar të LDK-së, Avdullah Hoti, i cili kishte thënë se do ta pamundësojnë ndarjen e Kosovës.
“S’ka mbet Kosova ta mbrojë Avdullah Hoti e për ta copëtuar ne. Kosova është strehë ku jetojmë bashkërisht. Sot është dashur që LDK dhe Avdullah Hoti të jetë në sallë që ne bashkërisht të marrim vendim që pozita dhe opozita të ishin në ballafaqim me Serbinë. Nuk është serioze, ndoshta është një lojë e fitimit të pushtetit përmes manipulimit të tillë, por hairin nuk ka me ia pa Kosova”, ka thënë ai.
Kreu i Kuvendit tha se duhet të ishin partitë shqiptare në Kuvend për të marrë vendim për Kosovën, por mos pjesëmarrja e opozitës ishte ajo që ndikoi që seanca e sotme të mos vazhdojë punimet.
“Mos pjesëmarrja e shqiptarëve në këtë sallë po shkakton këtë ndarje, e cila dëmton shtetin tonë dhe do të duhej të ishim bashkërisht të mos çonim mesazh të përçarjes te qytetarët”, ka thënë Veseli.
I pyetur se a ka pasur vota për vazhdim të seancës për shkak të kushtëzimit të deputetëve të Listës Serbe, kryeparlamentari Veseli ka hedhur poshtë një gjë të tillë, duke thënë se asnjëherë nuk do t’i nënshtrohen asnjë kushtëzimi.
“Kurrë nuk do të ketë në Kosovë kushtëzime nga Lista Serbe, sepse s’na ka bërë përshtypje kurrë Serbia, por i respektojmë kolegët e Listës Serbe, i thërrasim të marrin në vendimmarrje, por më shumë se të tjerët, sot është dashur që shqiptarët të jenë bashkë dhe nuk do t’i nënshtrohemi asnjë kushtëzimi”, tha Veseli.
Ai ka kërkuar që shqiptarët të jenë më të bashkuar, për një vendimmarrje në interes të qytetarëve, ndërsa premtoi se nëse bëhen 61 deputetë do të kthehet në seancë.
a.ç
