Kryetari i Partisë Demokratike të Kosovës, Kadri Veseli, prezantoi të enjten në Fushë Kosovë platformën qeverisëse “Fillimi i Ri”, e cila sipas tij, garanton sovranitetin e vendit dhe zhvillim ekonomik të qëndrueshëm.
“Në qeverisjen e ardhshme të koalicionit të madh të Fillimit të Ri të udhëhequr nga kryeministri Ramush Haradinaj, do të ketë fuqizim ekonomik. Fermerët tanë do të përkrahen anekënd vendit. Ata duhet ta dinë se kanë përkrahjen e institucioneve, në të njëjtën kohë duhet të punojnë edhe më fuqishëm në mënyrë që të zhvillojnë fermat”, tha Veseli.
Veseli tha se në boshtin e zhvillimit ekonomik, Fillimi i Ri parashikon angazhimin e të rinjve dhe grave duke u hapur perspektivë në punësim dhe krijim të vendeve të reja të punës.
Duke qenë në Fushë Kosovë ku 30 përqind të qytetarëve janë nga Lugina e Preshevës, Veseli tha se qeveria e Fillimit të Ri do t’i ndihmoj ata dhe do të punojë që shqiptarët të jetojnë në trojet e tyre në Luginë./b.d
