“Festat Lokale promovojnë produktet shqiptare, operatorët do të shtojnë ofertën turistike me se festat lokale. Shqipëria ka turizëm potencial që prodhon ekonomi dhe ofertë të diversifikuar“, kështu është shprehur ministri i Turizmit, Blendi Klosi nga festa lokale “Venë dhe verë” në Golem.
Kjo festë mblodhi bashkë dhjetra kantina të zonës së Shqipërisë së mesme dhe qindra turistë të cilët degustuan shijen e verës shqiptare. Klosi ndër të tjera tha se të tilla aktivitete tregojnë se në Shqipëri mund të bëhet turizëm potencial, që prodhon ekonomi, para e punësim, por edhe oferta të ndryshme turistike. Ministri apeloi tur operatorët që të shtojnë ofertën turistike duke përfshirë të gjitha festat lokale në paketat e tyre për turistët e huaj.
Ndër të tjera Klosi u kërkoi drejtuesve lokalë që të shndërrojnë këto festa në traditë. Festat lokale janë mundësi e mirë e prezantimit e produktit shqiptar te turistët e huaj, por edhe një ofertë e shtuar për ta. Kantinat e shumta të ngritura në zonën e Durrësit dhe të Kavajës përfaqësojnë një agroturizëm, dhe ky biznes do të jetë e ardhmja e turizmit në këtë zonë.
Ministri Klosi tha se këto biznese janë gjithashtu dëshmi e suksesit të programit të qeverisë për agroturizmin.
Kryebashkiakja e Durrësit theksoi po ashtu e pranishme në këtë festë tha se këto janë nisma që bëjnë ndryshimin vit pas viti në mënyrën sesi kemi zgjedhur të bëjmë turizëm në vendin tonë. Ndërsa kryetari i Bashkisë së Kavajës u shpreh se kjo festë gjeneron pozitivitet te turistët ndaj do të mbështetet nga kjo bashki edhe në vitet e ardhshme.
“Venë dhe Verë Fest ”e shndërroi pedonalen e Golemit në një hapësirë festive duke tërhequr turistët e shumtë që pushojnë në këtë zonë. Kantinat prezantuan produktet më të mira, të cilat u vlerësuan nga turistët e huaj, të surprizuar nga larmia e etiketave shqiptare dhe cilësia e verës së ofruar.
