Prekja e syrit nga diabeti, e njohur si retinopatia diabetike, mbetet një nga shkaqet kryesore të verbimit edhe në ditët e sotme, në moshat aktive për punë.
Sipas mjekëve specialist, numri i personave qe preken nga kjo sëmundje është vazhdimisht në rritje.
“Numërohen rreth 180 milion pacientë në të gjithë botën në bazë të Organizatës Botërore të Shëndetësisë dhe deri në vitin 2030 ky numër do të dyfishohet, tendenca është gjithmonë në rritje, kjo për shkak të stilit të jetës. Pacienti vjen tek ne nga ulja e shikimit ose dëmtimi i shikimit dhe në fund është verbimi”, tha Etleva Gjurashaj , mjeke okuliste.
Mjekët tregojnë se format e trajtimit janë disa, ndërsa sëmundja prek edhe moshat e reja.
“Nëpërmjet këtij trajtimi dhe follow up ne përpiqemi që këta pacientë të jenë gjithmonë të kënaqur dhe mos të kenë raste më shumë të shtuara ose të dëmtuara për shkak të prezencës ose mosardhjes së tyre këtu. Moshat janë 24 vjeç deri në 62 vjeç”, shtoi mjekja.
Për të gjithë personat të cilët vuajnë nga diabeti i syrit, bluzat e bardha japin disa këshilla.
“Kontrollet rigoroze tek të dy specialistët, e para tek endokrinologu, diabetologu dhe pastaj tek ne, e dyta ndryshimi i stilit të jetës, aktiviteti fizik një dietë e balancuar mirë, për të bërë diagnostifikime të hershme”, deklaroi Gjurashaj.
90% e pacienteve me diabet të tipit 1 dhe më shumë se 60 % e atyre me diabet tip 2, paraqesin prekje të syrit. /Vizion Plus/ a.m.
