Stina e verës, me temperaturat e saj të larta, ngjall ndjesi pozitive, sjell më pranë pushimet, relaksin dhe argëtimin.
Por… nuk është kështu për të gjithë !
Studime të ndryshme kanë arritur në përfundimin se temperaturat e larta, zgjatja e ditës, pushimet jo mjaftueshmërisht të gjata, ndikojnë negativisht në gjendjen shpirtërore të shumë njerëzve.
Një grup studiuesish europianë, pas një studimi të zhvilluar pak kohë më parë, arritën në përfundimin se në gjendjen psikologjike të njerëzve ndikojnë gjashtë faktorë të ndryshëm si: temperatura, era, rrezet e diellit, reshjet, presioni i ajrit dhe kohëzgjatja e ditës.
Kjo ndjesi e krijuar prej stinës, që në psikologji njihet si “S.A.D” (Seasonal Affective Disorder. Shqetësime ndjesore sezonale), shfaqet më së shumti në fillim të stinës, pasi trupi i njeriut e ka më të vështirë përshtatjen.
Ndryshimi i humorit varet dhe nga ndryshimi i përditshmërisë. Po ashtu, stina e verës duket gjithnjë e shtrenjtë në shpenzime dhe ky është një shqetësim i përgjithshëm.
Një studim tregon dhe varësi mes gjendjes shpirtërore dhe vitaminës D, e cila është pjesë e rëndësishme e një diete të shëndetshme dhe mënyrës së jetesës. Kjo vitaminë mund të merret nga ekspozimi në diell.
Njerëzit të cilët ekspozohen jo mjaftueshëm në diell mund të përjetojnë dhe ndjesi depresioni, ndërsa ata që ekspozohen mjaftueshëm mund të ndjehen të lumtur. Megjithatë, nuk duhet të merret e mirëqenë lidhja e motit me humorin tonë. Një humor negativ nuk është nga shiu, era, bora, apo temperaturat e larta, gjithçka është e lidhur me temperamentin tonë, si ne kemi zgjedhur të përjetojmë kushtet e motit
Një prej vështirësive që të gjithë hasim në stinën e verës është edhe kthimi nga pushimet. Ndaj specialistët këshillojnë që të mos harxhojmë kohë dhe energji për të menduar sa do të zgjasin pushimet, mos u ngarkoni me ndjesi negative. (java / r.a)
