Momente tensioni në Karakas janë shënuar mbrëmjen e së dielës. Armët kundërajrore hynë në veprim mbi qiellin e kryeqytetit rreth orës 20:00 në Venezuelë. Një shkëmbim zjarri me armë automatike u raportua pranë pallatit Miraflores. Në rrjetet sociale u përhap paniku i një sulmi të ri amerikan. Për një orë qyteti mbeti duke mbajtur frymën, pastaj sërish heshtje dhe njerëzit u mbyllën në shtëpi.
Shpjegimi i dhënë nga zëdhënësi i qeverisë nuk fsheh nervozizmin: “Një incident i shkaktuar nga një konfuzion i brendshëm mes forcave të sigurisë”. Thuhet se janë ngritur në fluturim dronë patrullimi pa u informuar personeli në tokë, i cili më pas ka tentuar t’i rrëzonte si “të paidentifikuar”. Dy orë më parë, presidentja e përkohshme Delcy Rodríguez, e sapo betuar në Asamblenë Kombëtare, vizitonte mauzoleun e Hugo Chávez, i goditur natën e 3 janarit gjatë operacionit amerikan ku u kap presidenti Nicolás Maduro.
Është ora e paranojës dhe e represionit në rrugët e Karakasit. Dhjetëra pika kontrolli vendosen në qytet. Në gazetën zyrtare publikohet një dekret për gjendjen e emergjencës që urdhëron autoritetet të “ndërmarrin menjëherë kërkimin dhe arrestimin e çdo personi të përfshirë në promovimin ose mbështetjen e sulmit të armatosur të Shteteve të Bashkuara kundër territorit të republikës”. “Nuk ka asnjë agjent të huaj që qeveris Venezuelën”, siguron presidentja e përkohshme Rodríguez.
Colectivos, formacionet paramilitare të lidhura me Maduron, janë dislokuar në rrugë pas dekretit të emergjencës. Deri tani, 14 gazetarë janë arrestuar, 11 prej tyre të mediave të huaja janë mbajtur për disa orë para se të liroheshin. Njëri prej tyre është dëbuar pas ndalimit.
Ka një bilanc të parë zyrtar të viktimave venezueliane të sulmit, edhe pse i pjesshëm. Sipas burimeve zyrtare, 24 agjentë të forcave të sigurisë janë vrarë. Autoritetet publikojnë foto dhe identitetet. Edhe në Kubë, Granma, gazeta e partisë, zbulon identitetet e 32 kubanëve të vrarë. Bilanci i konfirmuar është 56 forca rendi të rëna në betejë. Por vlerësohet se numri total i të vdekurve është të paktën 80.
Heshtjen e thyen edhe një tjetër mbështetës i palëkundur i Maduros, prokurori i përgjithshëm i Venezuelës Tarek William Saab. Ai deklaron se në total “dhjetëra” funksionarë dhe civilë janë vrarë në sulm dhe se prokurorët do të hetonin vdekjet në atë që e ka cilësuar si një “krim lufte”. Ai i drejtohet edhe gjykatësit të Nju Jorkut që duhet të vendosë për çështjen e Maduros: “Të njohë paaftësinë e gjykatës së tij për këtë rast”.
Thirrja e bërë nga organizatat kryesore të të drejtave të njeriut, e më pas e mbështetur nga platforma e opozitës së Maria Corina Machado, për të kryer një amnisti dhe për të liruar në bllok të gjithë të burgosurit politikë për të favorizuar tranzicionin, bie në bosh. Madje sjell efektin e kundërt: Komiteti për lirimin e të burgosurve politikë raporton se të ndaluarve për arsye politike u është pezulluar e drejta e vizitës dhe u ndalohet komunikimi me botën e jashtme. Ka shqetësim për të burgosurit ndërkombëtarë.
