Venezuela e shpreh hapur besnikërinë ndaj Rusisë dhe thotë se nuk do ta njohë kurrë Kosovën. “Kosova është pjesë historike e Serbisë, siç është Krimeja pjesë e Rusisë”, shprehet e ngarkuara me punë në Boegrad, Nader de El-Andari.

“Venezuela ka qenë gjithnjë në anën e Serbisë në të gjitha organizatat ndërkombëtare. Siç edhe Serbia ka bërë për ne”, ka thënë ajo në një intervistë për të përditshmen “Politika”, raporton B92.

Ajo e komenton si përpjekje e Kosovës për t’u njohur nga Venezuela mbështetjen që ministri i Jashtëm i Kosovës, Behgjet Pacolli, i ka dhënë presidentit të vetëshpallur venezuelian që në ditët e para. Ndërsa në lidhje me mundësinë e një lufte civile në Venezuelë, El-Andari thotë se kjo ka qenë prej vitesh një synim i SHBA-ve.

“Për 6 vjet me radhë, SHBA-të janë përpjekur të provokojnë një luftë civile dhe nuk ia kanë dalë. Në Jugosllavi, besimi fetar është përdorur për të provokuar luftë civile, por situata në vendin tonë është ndryshe”, ka thënë ajo.

Sipas diplomates së Venezuelës në Beograd, SHBA-të mund të ndërhyjnë indirekt ushtarakisht në Venezuelë, duke përdorur Meksikën ose Kolumbinë. Ndërsa për presidentin e vetëshpallur Huan Guaido, ajo thotë se është një kukull e SHBA-ve, që më shumë njihet jashtë sesa në vendin e vet./a.meta