Në Kuvendin e Shqipërisë ka nisur seanca plenare ku do të votohen raportet e Këshillit të Mandateve për kërkesën e prokurorisë për autorizimin për arrestimin e Saimir Tahirit, mes akuzave politike që kanë përplasur opozitën me mazhorancën.
Por në gjithë zallamahinë që ka shkaktuar kërkesa pa prova e prokurorisë, ka një fakt që hedh dritë mbi mungesën e integritetit të këtij procesi dhe që dëshmon se prokurorët kanë gënjyer në këshillin e mandateve.
Prokurorët kanë deklaruar se nuk ka patur asnjëherë më parë kërkesë për hetim ndaj Habilajve dhe përfshirjes së Tahirit në veprimtarinë e tyre kriminale, por në fakt rezulton se një kërkesë e tillë erdhi nga vetë Tahiri në vitin 2015. Madje ekziston një vendim i mbylljes së hetimit ndaj Tahirit në 2015, në të cilin porkuroria e shpall atë të “pastër” nga akuzat se makina e tij ishte përfshirë në trafik droge me Habilajt. Vendim ky që tregon, e zeza mbi të bardhë, se prokurorët nuk kanë thënë të vërtetën para deputetëve në këshillin e mandateve.
Në 11 Shtator 2015 Saimir Tahiri ka shkuar te prokurori i përgjithshëm duke i kërkuar hetim pas deklaratave publike për përfshirjen e makinës së tij nga Habilajt në trafik droge.
Pas kësaj, Prokuroria e Kirmeve të Rënda ka rregjistruar procedimin penal nr.15 82 për këtë cështje, që është mbyllur në datë 29.12.2015 me një vendim. Në Këshillin e madateve, vendimi i këtij hetimi u citua nga Tahiri.
“Për sa i përket përfshirjes se automjetit tip AUDI A8 me targa A00 3GB në aktivitetin kriminal të lëndëve narkotike, nga të gjitha aktet e administruara rezultoi se ky fakt nuk ekziston. Në të gjitha aktet e shtetasve të përfshirë në trafik, nuk përmendet ky automjet. Madje ky automjet nuk përmendet as në aktet e përpiluara nga vetë shtetasi Dritan Zagani, me detyrën shef i sektorit të narkotikëve në qarkun Vlorë”-konkludonte prokuroria.
Personin që prokuroria e krimeve të rënda e nxori të pastër në Shtator të 2015 pas një hetimi të gjatë, bazuar mbi aktet që posedonin, tanimë e shpall njeri të përfshirë në trafik, pas një “hetimi” 72 orësh, pa i rezultuar emri në asnjë nga materialet që u morën në shqyrtim.
Kujtojmë se emri i deputetit Tahiri, përmendet nga persona të tretë që hetohen për vepra penale në fushën e narkotrafikut nga organet e drejtësisë së shtetit italian, por në asnjë material të paraqitur, si në materialet e ardhura nga organet e drejtësisë italiane , ashtu dhe në materialet e procedimeve penale të nisura nga organi i akuzës në Shqipëri, nuk rezulton në asnjë moment që deputeti të ketë qenë pjesë e komunikimeve me trafikantet, që do të krijonin bindje se është përfshirë në veprimtari kriminale, është një argument tjetër i mazhorancës. /Lexo.al/b.d
