Të gjithë punonjësit e Bashkisë, që nga kryetari deri te sekretarja, duke nisur nga muaji që lamë pas do të paguhen më tepër. Këtë parashikon një nga projektvendimet që pritet të shqyrtohet në mbledhjen e Këshillit Bashkiak të mërkurën e javës që vjen, më 11 tetor. Kjo bazohet në vendimin nr.586, datë 17.03.2013, të Këshillit të Ministrave, i cili caktoi së fundmi kufijtë e pagave të punonjësve të organeve të qeverisjes vendore.
Keshilli Bashkiak i Tiranes
Kështu, kryetari Erion Veliaj do të marrë një shumë prej 174 760 lekë, ndërsa më pak do të paguhen sekretarët apo specialistët me arsim të mesëm, nëse ka të tillë në Bashki. Po ashtu, parashikohet të pësojë rritje me 1 mijë lekë edhe paga minimale e punonjësve të qytetit në Ndërmarrjet nr.1, nr.2 dhe nr.3., që së fundmi janë etiketuar si parkingu politik i paraardhësve në këtë institucion.
RRITJA
Në fillim të listës kryeson kryebashkiaku,i cili nuk paguhet më 140 000 lekë sipas vendimit nr 1619 datë 2.07.2008, por rreth 30 mijë lekë me tepër.
Të njëjtën pagë që dikur merrte kryebashkiaku, me vendimin e ri (nëse votohet) e marrin katër nënkryetarët e bashkisë: Brunilda Paskali, Arbjan Mazniku, Andi Seferi dhe Isuf Shehu. Të njëjtën pagë parashikohet të kenë drejtori i kabinetit, sekretari i këshillit bashkiak dhe drejtori i përgjithshëm, 107 800 lekë.
Ndërsa ata që do të kontraktohen nga bashkia për punë të ndryshme, nuk do të marrin më tepër se 34 mijë lekë, aq sa merr një sekretar apo specialist me arsim të mesëm i punësuar me kohë të plotë në këtë institucion.
Në fund të tabelës janë pagat për punonjësit e Policisë Bashkiake, që variojnë nga 34 800, që merr në punonjës policie në një zonë të vogël administrative, deri në 86 850 që është paga më e lartë, e cila i takon kryeinspektorit të Policisë Bashkiake. Theksojmë se të gjitha efektet financiare do të përballohen me buxhetin aktual të Bashkisë, atë për 2015-n.
PAGA MINIMALE
Bashkia e Tiranës ka menduar edhe për punëtorët e qytetit, ata të Drejtorisë së Përgjithshme nr.1, nr.2 dhe nr.3, të cilët do të paguhen jo më pak se 22 mijë lekë.
“Për efekt ndryshimi në shkallë vendi të pagës minimale në shumën 21 000, sipas përcaktimit të vendimit të Këshillit të Ministrave, nr.573, datë 03.07.2013, për ‘Përcaktimin e pagës minimale në shkallë vendi, paga bazë për punonjës të Drejtorisë së Përgjithshme nr.1 të punëtorëve të qytetit, Drejtorisë së Përgjithshme nr.2 të punëtorëve të qytetit, Drejtorisë nr. 3 të punëtorëve të qytetit për klasën I, II dhe III duhet të bëhet 22 000 lekë”, thuhet në projektvendim.
Po njëlloj do të paguhen edhe punonjësit e qendrave sociale: “Të qëndrojmë së bashku”; “Qendrës Sociale multidisiplinare” dhe qendrës sociale “Shtëpia e përbashkët”. Rritje page do të përfitojnë edhe punonjësit e Inspektoratit të Mbrojtjes së Territorit dhe ata të Drejtorisë së Përgjithshme të Tatim Taksave.
Një nga pikat e projektvendimit parashtron mundësinë që 23 punonjës të policisë së njësive administrative apo ish-komunave t’i kalojnë në varësi Policisë Bashkiake. /Panorama
