Qeveria së fundmi ka miratuar një rregullore të re e cila duhet të zbatohet në punë e që ka të bëjë me aspektet mjekësore.
Rregullorja ka ndryshuar kohën kur duhet të dorëzohet raporti i aftësisë në punë, duke e çuar çdo 3 muaj.
Aktualisht, sipas Kodit të Punës, ky raport duhet të dorëzohet çdo 6- muaj, kohë e cila mund të ndryshojë në varësi të rrezikshmërisë që paraqet vendi i punës, raporton Monitor.
“Raporti mjekoligjor për vërtetimin e aftësisë në punë të punëmarrësit dorëzohet në momentin e punësimit dhe ka një vlefshmëri 3-mujore nga data e lëshimit të tij”, thuhet në këtë rregullore të miratuar tashmë nga qeveria.
Por, ekspertët thonë se ky ndryshim duhet të reflektohet edhe në Kodin e Punës të ndryshuar dhe që ka hyrë në fuqi në datë 22 qershor të këtij viti.
Në të përcaktohen edhe rregullat se kur dhe si duhet të kryhet kontrolli nga mjeku profesional në punë.
Por, vendimi përcakton edhe periudhë prej 1 viti, që do t’i lihet në dispozicion punëdhënësit për të bërë ndryshimet e kërkuara : “Të gjithë punëdhënësit, brenda një periudhe deri në një vit nga hyrja në fuqi e këtij vendimi, sigurojnë zbatimin e rregullave e të procedurave për kryerjen e ekzaminimeve mjekësore profesionale, në varësi të kushteve të punës që do të kryejë punëmarrësi, si dhe kontrollin mjekësor të pranimit në punë dhe atë periodik të punëmarrësve, në përputhje me dispozitat e këtij vendimi”.
Rregullorja përcakton edhe sesi duhet të veprohet në rast se një person punon në dy punë : “Punëdhënësi, tek i cili punëmarrësi është në një punë të dytë, do të pranojë një kopje të raportit të kontrollit shëndetësor të vizitës mjekësore profesionale të kryer në punësimin parësor, të miratuar nga punëdhënësi si një vërtetim i përshtatjes së punëmarrësit me punën që do të kryhet, nëse faktorët e riskut specifik të mjedisit të punës dhe kushtet e punës janë të njëjtat si në punësimin parësor të punëmarrësit”./a.m.
