Këshilli i Ministrave ka miratuar një fond prej 98 milionë lekë të reja, i cili do të përdoret për shpërblimin e policëve. “Lejimin e Policisë së Shtetit për përdorimin nga fondi i pagave, të planifikuar për vitin 2015, në programin buxhetor “Policia e Shtetit”, për shpërblimin e punonjësve të Policisë së Shtetit, që kanë arritur rezultate të larta në kryerjen e detyrës. Masa e shpërblimit të jetë deri në 2 paga mujore”, – thuhet në vendimin e Këshillit të Ministrave të miratuar në mbledhjen e së mërkurës.
Propozimi për shpërblimin e policëve është bërë nga Ministri i Brendshëm Saimir Tahiri. Dy pagat shpërblim për policët do të jepen gjatë muajit dhjetor, pasi të hartohet edhe lista e përfituesve.
Vendimi i plotë i qeverisë:
Në mbështetje të nenit 100 të Kushtetutës, të nenit 143, të ligjit nr.108/2014, “Për Policinë e Shtetit”, dhe të ligjit nr.160/2014, “Për buxhetin e vitit 2015”, të ndryshuar, me propozimin e ministrit të Punëve të Brendshme, Këshilli i Ministrave
V E N D O S I:
1. Lejimin e Policisë së Shtetit për përdorimin e fondit prej 98 400 000 (nëntëdhjetë e tetë milionë e katërqind mijë) lekësh, nga fondi i pagave, të planifikuar për vitin 2015, në programin buxhetor “Policia e Shtetit”, për shpërblimin e punonjësve të Policisë së Shtetit, që kanë arritur rezultate të larta në kryerjen e detyrës.
2. Masa e shpërblimit të jetë deri në 2 paga mujore.
3. Ngarkohen Ministria e Punëve të Brendshme dhe Ministria e Financave për zbatimin e këtij vendimi.
Ky vendim hyn në fuqi menjëherë.
