Shtetet e Bashkuara të Amerikës kanë reaguar pas vendimit të Dhomave të Specializuara të Kosovës në Hagë ndaj katër ish-drejtuesve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi.
Në një përgjigje për A2 CNN, Departamenti Amerikan i Shtetit deklaroi se Shtetet e Bashkuara respektojnë vendimin e Gjykatës Speciale dhe rikonfirmuan mbështetjen për drejtësinë, procesin e rregullt ligjor dhe sundimin e ligjit.
“Shtetet e Bashkuara respektojnë vendimin e Dhomave të Specializuara të Kosovës sot”, thuhet në përgjigjen e Departamentit të Shtetit.
SHBA thekson se mbështet drejtësinë për të gjitha viktimat dhe familjet e tyre, ndërsa rikonfirmon mbështetjen për llogaridhënien, procesin e rregullt ligjor dhe sundimin e ligjit.
“Ne u bëjmë thirrje të gjitha palëve të respektojnë vendimin e gjykatës, të shmangin retorikën nxitëse dhe të vazhdojnë të punojnë drejt një të ardhmeje paqësore dhe demokratike”, vijon deklarata.
Dhomat e Specializuara të Kosovës në Hagë shpallën sot aktgjykimin ndaj katër ish-drejtuesve të UÇK-së.
Hashim Thaçi dhe Jakup Krasniqi u dënuan me nga 25 vite burgim, Kadri Veseli me 18 vite, ndërsa Rexhep Selimi me 13 vite.
